Олӧмлӧн потласьӧм · КОС КАБЫР (Иван Худяев), 1926.

Эн узь, чашкӧд синъястӧ!

Узигӧн олӧмлысь гажъяссӧ воштан...

Гожся рытын менӧ малалӧ небыдик, шоныд сынӧд. Сьӧлӧмӧ пырӧ нӧкйӧн моз мавтыштӧ, небзьӧдӧ корӧгмӧм яйӧс.

Пожӧмъяс! Пашня дорын тшӧтшыд тугйӧн сувтӧмныд тшӧкыда, бӧръя югӧръяс шонділысь кыйянныд ті, сынӧдлысь ловъя–пӧлялӧмъяс нёнялад сьӧмӧсад! Рӧмдалад, пӧртмасяд, синъясӧс лӧньӧдад ...

То–нӧ, кыдз ӧтнас шогсьӧ пожӧмъяс шӧрын, вашкӧдчӧ шонді–зарниӧн мавтыштӧм коръясӧн, мойдалӧ олӧмлысь туйяссӧ, пессьӧмсӧ, венсьӧмсӧ, пӧрысьӧ вошӧмсӧ. Норасьӧ ньӧжйӧник... Сьӧлӧмад шог тэчалӧ...

Лэбыштіс тӧв–ныр, шызьӧдіс, повзьӧдіс, збоймӧдіс норъясӧс, лэптыштіс збойъясӧс, шутьнитіс, зургысис вӧр–дорӧ, йивъяссӧ вӧрзьӧдіс...

Кусі... бӧр лӧнис, выныс эз тырмы. Тшӧтшыд пожӧмӧ гудрасис. Видзчыся водзӧ. Шонді кольччыны кӧсйис, читкыртіс синсӧ, видзӧдліс, мӧвпыштіс, сылі... "Нинӧмла кольччыны... луннас нин удита унатор аддзыны: шогсӧ дай гажсӧ, бурсӧ дай лёксӧ".

Пемдӧ, пемдӧ, пемдӧ... Ме видзӧда... Бара кытыськӧ волыштіс тӧв–йыв, бара помасис татчӧ, бара этша вынсӧ вайис. Мыйла кӧ йивнас сӧмын татчӧ локтӧ, оз морӧснас мыж, оз петкӧдлы олӧм–кыпӧдысь вынсӧ.

Видзчыся... Со... Сьӧлӧм таркӧдӧ, типкӧдӧ, мыйяскӧ видзчысьӧ, мыйысь кӧ полӧ, чеччалӧ морӧсын... Шутёвтіс ёна, пӧльыштіс чорыда, джын выйӧдз пыркнитіс вӧрӧс. Ылын йиркнитіс, гымыштіс, чорыда мӧдысь, шузьӧдіс сьӧлӧмӧс; шузьӧдіс, вӧрзьӧдіс вужйӧдзыс вӧрӧс, качовтіс пыдӧссӧ. Мӧдіс, мӧдіс, мӧдіс! Чеччалӧ радысла, оз инась вирӧй, пузьӧдӧ сьӧмӧсӧс менсим.

Видзчысьӧмӧн, видзӧдӧмӧн, полӧмӧн син водзысь менам воштысьӧма олӧмсӧ. Вой пемыд вевтулын эг аддзыв матысьман кымӧръяс, вошті син водзысь ас гӧгӧр пессьӧмсӧ. Нӧк–сынӧд чунялӧм...

Гым менӧ пыркнитіс, садьмӧдіс узьӧмысь, син воссис чард биысь.

Ме ӧні ола бара, бара сьӧлӧм олӧмкӧд типкӧ кывзысьӧ гым йирӧ.

Мый лои водзӧ...?

Венам ми, садьмысьяс!
*   *   *

Тадзикӧн олӧмын унаысь пальӧдысь, шызьӧдысь, сьӧлӧм паськӧдысь, лов лэптысь вынъяс локтӧны. Воддзайяс кусасны, лӧнясны, выннысӧ туй вылын воштасны..

Мед бӧрын волывлӧ гым, чард; гора, чорыда миянӧс бергӧдлӧ, пузьӧдӧ вирнымӧс, косьясӧ тойлалӧ, вунӧдны гӧгӧрса венсьӧмсӧ оз лэдз.

Тадзикӧн олам, буръяссӧ корсям, лёкъяссӧ пыркнитам.

Вунӧдчам — эн пов — пыркнитасны!!

Печатайтӧма Ордым журналын 1926 вося #2.