Komi Zyrians Traditional Culture

КОМИ КУЛЬТУРА ГРАММАТИКА СЛОВАРИ ЛИТЕРАТУРА МУЗЫКА ТЕАТР ЭТНОГРАФИЯ ФОТОАРХИВ КНИГИ

ГЕННАДИЙ ЮШКОВЛӦН ОРДПУ

Быдӧнлы позьӧ пыравны канмуса архивӧ да сэні куйлан кабалаясысь корсьны тіянлы колана юӧр. Важ олӧм туялысьлы тані отсаласны. 1918 воӧдз мортлысь чужӧм, гӧтрасьӧм да кулӧм тырвыйӧ пасйӧмаӧсь вичкоын. Роч нимыс гижӧдыслӧн "метрическӧй книга". Унджык коми сиктысь татшӧм гижӧдъяссӧ чукӧртӧма Усть-Сысольскса вичко веськӧдланінын, став юкӧныс вурӧма ӧти кыз небӧгӧ. Кабала кудъясыс быд во содӧмаӧсь, а вичкояс бырӧдӧм бӧрын найӧс босьтісны Коми обласьтса архивӧ.

*   *   *

Ме дыркодь нин туяла ассьым рӧдвужӧс Усть-Сысольск да Визинга вичко небӧгъяс серти. Сэсся мӧвпышті: а вай ме видлалышта тшӧтш и Зеленечса гижӧдъяс, медым лӧсьӧдны Г.А.Юшковлысь ордпу да козьнавны сылы 75 во тыригкежлас.

И со мый ме тӧдмалі. Кряжская грезд, кӧні чужлӧма Г.А.Юшков, ӧні шусьӧ Краснаяӧн. 1861 воӧдз грездын олысьяс лыддьысьӧмаӧсь Зеленеч вичко бердын эскысь котырсаясӧн. А локтан вонас найӧс вуджӧдӧмаӧсь Час сиктса вичкоӧ. Сы бӧрын Кряжскаяын кӧ чужис кага, ворсӧны кӧлысь, куліс морт, — лоӧмторсӧ вынсьӧдны йӧзыс ветлывлісны Часса вичкоӧ.

1863 воын Кряжская грездын кыпӧдісны часовня. Службасӧ нуӧдны попыс волывліс Часысь жӧ.

Босьті киӧ Зеленеч вичкоса медся важ небӧгсӧ — 1792 вося "Исповедальнӧй ведомость". Сэтысь аддзи, мый Кряжская грездын олісны сӧмын 3 котыр: кыкас — Юшковъяс (Василейлӧн да Архиплӧн йылӧмыс). Налӧн айясныс овмӧдчывлісны татчӧ, Эжва юсайса Зеленеч сиктсянь неуна улӧджык, 1720 вояс гӧгӧр.

Коли гӧгӧрвотӧмӧн: Геннадий Юшков да Кряжская грезд артмӧдысь Юшков абу-ӧ ӧти вужйьісь? Oнія Краснаяын тӧдӧны, мый Геннадий Анатольевичлӧн пӧль-пӧчыс абу выль олысьяс, а грездсӧ подулалысьясыс. Ачыс Геннадий Анатольевич рӧдвужсӧ кужис лыддьыны Ёгорсянь: Ёгор Вась Анна Геня. Сэсся мӧвпыштіс да содтіс: Ёгорыс — Иванлӧн. Колӧ тӧдчӧдны, нималана коми гижысь эз аддзыв весиг ассьыс ыджыд батьсӧ — Анна Васильевна мамыслысь айсӧ.

Зеленеч да Час вичкоса гижӧдъяс серти Ёгор Юшковлӧн Иван батьыс, кодӧс казьтыліс Геннадий Анатольевич, лоӧ Кряжская грездын медводдза олысь Архип Семёнович Юшковлӧн внукӧн. А Геннадий Юшковлы Иван Ёгорыс — прапрадед. Артмӧ, мый Кряжская грездлысь подувсӧ пуктысь Юшков да Геннадий Юшков ӧти вужйысьӧсь.

Сідзкӧ, 1932 вося март 15 лунӧ чужис Семӧ Архип Педӧр Иван Ёгор Вась Анна Геня.

Надежда МИТЮШЕВА, 2007.

По информации Елены Козловой, предсеателя Коми Союза писателей, это же полное имя Геннадия Юшкова по Коми традициям, но с более привычным произношением имен, должно звучать так:

Сем Ар Педь Вань Ёгор Вась Анна День.

Геннадий Юшков

Реклама Google: