ШУД · Изъюр Иван (Иван Изъюров) · висьт (1932)

1

И ставыс тайö заводитчис колхозса собрание вылын...

Йöз мышъяс сайын пукалiс Митипер гöтыр, кывзic, мый мукöд сёрнитöны. Нинöм эз виччысь, и друг:

— Кыдъюрова Öпрöсиння!— кылiс пызан дорсянь.

Эз шыась Öпрöсь: чайтiс — ылалiны.

— Кыдъюрова Öпрöсиння?— юалiс мöдысь юралысь да синъяссö кутiс новлöдлыны йöз пытштi. А син бöрсяыс и юрыс вöтлысьö.

— Митипер гöтыр!— горöдiс водзысянь Кладюк.

"Менö?"— быдсöн повзис Öпрöсь. Кöсйис йöз мышъяс сайö сайöдчыны, да индiсны:

— Тонö тай, пач дорас...

— Кыдъюрова Öпрöсиння! Тэ лоан скöтничаöн,— юралысьлöн синъясыс вöлисти воисны Öпрöсь вылö, пырисны пытшкö, гудыртiсны сьöлöмсö. Юралысьлöн синъясыс мелiöсь, и чужöмыс нюмъялö, а повзьöдiсны Öпрöсьöс. Нинöм эз вермы шуны:

— Ме... ог...

— Нинöм, отсалам. Производственнöй совещание тэно индiс.

Тадзи Митипер гöтыр колхозса собрание вылын бöр пöри Кыдъюрова Öпрöсинняö.

Комын нёль во нин Öпрöсь олö шондi улын. Дас сизим восö Öпрöссинняöн, а мöд дас сизимсö Митипер гöтырöн. Кымыныськö эштылiс нин шуны:

— Шонъянöй! Коркö шудыс меным волас оз–а?

Комын нёльысь волiс тöв, комын нёль гожöм мунiс Öпрöсь син водзын, а Öпрöсьлы шуд эз вай. Кажитчö, воысь воö сылöн шудыс ылысмис, некöн весиг оз тыдав, дай эз тыдовтчыв. Ныв дырйи олiгöн верöс сайö мунöм надея сьöлöм сетлiс, а верöс сайö мунöм бöрын и тайö надея эз ло. Воши, быттьö ваö шыбитöм из вöйи.

Катласьлывлiс Öпрöсьяс сиктын гöрд юра Митипер. Став олöмыс сылöн вöлi катласьöм. Быттьöкö гез йылö шöрöдыс шыркöдöм потш. Лöз дöра гача, пыш дженьдöс дöрöма (Варлам пилöн лавкаас куль мешöкъясыс сыысь мичаджыкöсь), олiс öтнасöн юр пöла керкаын. Мунö улича кузя — челядь вöтчöны да нерöны:

— Гöрд Митипер!..

— Кыд юр — пызь юр, дзик йöй юр...

— Юр пöла керка!

Уськöдчылас челядь вылö — сявмунöны, вошöны, некод оз сюр. Мунны водзö кутас — бара нин вöтчöны.

Кызь вит арöсöдз олiс Митипер да век важ кодьыс коли. Нинöм содтыны ни бурмöдны эз вермы. Выль видзьяс вöчöмöн кöсйис овмöдчыны — эз артмы. Колö öд вöвтö вердны, асьтö вердны–юктавны, пасьтöдны–кöмöдны — кысь выль видзсö вöчны уна кадыс да выныс. Кык гожöм чöж гурйысис да куим додь эжöр шедны кутiс, а косаöн шеныштчыны прамöя некöн. Сiйöн нö мöс али öш видзан? Варлам пилы тöвбыд вöлöн казакалiс да дас кык шайт чöжис думсьыс. Чайтiс нин — сэтшöм озыр мортöн лоис, мый кöть Варлам пикöд орччöн лавка сувтöд. А дас кык шайтсьыд Варлам пи сетiс нёльöс, мукöдсö уджйöзö бергöдiс. Батьсяньыс на кыссьö волi. Места вылас гöгралiс, а тöлк эз ло. Кызь вит арöс тыртöм бöрын босьтiс да Öпрöсьöс вайис. Öпрöсьлы быть мун — сизим чойыдлы колö кытчöкö воштысьны. Да и керка сылöн эм, кöть и юр пöла да, сэсся вöв. Мунiс дас сизим арöсöн Öпрöсь верöс сайö да воштiс ассьыс ним — лои Митипер гöтырöн.

Дзугсисны ныв кöсаяс, пратясис юрси, вушйис чужöм вылысь банйöм пирöг сер. Юр сыныштны некор — пратьясöн да комöкъясöн юрсиясыс öшалöны. И лоины сиктын кык сералантöр: лоз дöра гача (венеч ув гач), еджыд дöра дöрöма (Öпрöсь сьöрсьыс вайис шабдi сöдз дöрöм), кучик кизя, гöрд юра Митипер да пратьось юрсиа Митипер гöтыр. Юр пöла керкалы мöд полыс эз кай, а картаын сартас кока вöв дорö содiс ёкмыль кодь мöс да Дiныш Прокö кулак ыджда баля — Öпрöсьлöн став приданнöйыс.

— Митипер гöтырыс ёкмыльсö бара нин кыскö,— шмонитöны карта водзьяссянь бабаяс Митипер гöтыр (абу нин Öпрöсиння) мöс вылын.

Сiдзи и колины вояс. Содöм пыдди нинöм абуыс чинны пондiс. Митиперöс нуисны война вылö, да эз и волы. Вöвсö Варлам пилы куим додь турунысь лои сетны, куим лун нöшта уджавны кöсйис дай. А локтан арнас Варлам пи Öпрöсьлысь мöссö нуис нелямын шайтысь.

Митипер эз ло, а Митипер гöтыр нимыс Öпрöсьлы колис öнöдз на. Сiйöн и талун Кыдъюрова Öпрöсиннянад став йöз дырйи шуисны да нимкодь лои. Собрание вывсянь гортас мунöм бöрын тайö медъёна юрас бергалiс!..

"Ме — Кыдъюрова Öпрöсиння, ме — Кыдъюрова Öпрöсиння". Гажаджык кажитчис важ керкаыс, нимкодьджыка колис вой, небыд лоис аслас нэмöвöйя вольпасьыс.

Асывнас Öпрöсьлы медвойдöр мöвп вылас уси колхозса юралысьлöн тöрытъя шуöмыс:

— Кыдъюрова Öпрöсиння...

Тöрыт тайö кык кывйыс юрас сэтшöма пырис, мый мöд джын йывсьыс эз и мöвпыштлы. Сöмын талун дзоньнас юралысьлöн шуöмыс пеляс жбоньгыны кутiс:

— Кыдъюрова Öпрöсиння, тэ лоан скöтничаöн.

И тайö дзоньнас кутiс кажитчыны ыджыдджыкöн воддза кык кывсьыс, ассьыс важ нимсö перйöмсьыс.

"Кыдзи и том дырйи — Öпрöсиння. Абу Митипер гöтыр ни абу Öпрöсь, а Öпрöсиння Кыдъюрова, кодлы колхозысь сетiсны дöзьöритны дас вит мöс",— мöвпавны аслыс кутiс.

А Öпрöсьлы олöмас меддонаторйыс мöс и вöлi. Мед аслас омöлик Калюшыс вöлi, а век жö йöвтортö сетыштiс, выйыд праздник лунъясö вöлыштiс и. Öпрöсьлöн и вежаланторйыс сиктас волi кык–куим олысь. Кажитчис, мый кык мöска олысьö кö воан — сэсся нинöм оз и ков, сэнi и став шудыс. Öд Калюшыс вöлi куканясяс да кутшöм гажа лолö, праздник кодь. Вот, эськö... да кытчöдз мöвпъяснад он волы, вöтын моз. Сiйöн и талун нимкодь, пачын ломтысян пес моз жö ыръялö сьöлöмыс. Öд нэм öти мöс гöгöрын гöгралiс, а öнi лоö дас вит гöгöрын.

Кутшöма öд керкаыс и картаыс гажтöммылiс, кор мöскыс воддза воас кулi. Уна синва кисьтiс, сöмын сiйöс сылысь некод эз аддзыв. Уна синва кисьтiс Öпрöсь и колхозö пыригöн. Öд дзик нинöм абунад абу жö лöсьыд пырныд. Йöзлöн вöв, плуг, телега, а Öпрöсьлöн — нинöм. Яндзим вöлi йöзсьыс — сiйöн и медводз век удж вылö котöртiс, медуна трудодень сылöн век кайис.

2

Кор Öпрöсь воис скöт картаö — öдзöсъясöд вöлi буретш петöны мöсъяс. Со — Макар гöтырлöн Серöдыс, со — Иван Öдялöн Сьöдъюрыс, со — Семö Миш гöтырлöн Сьöдпельыс,— лыддьöдлыны кутiс Öпрöсь. Быдöнлысь мöсъяссö тöдö, а аслас мöс абу. Эз вöвлы да öд, дерт, абу. Кöть век виччысь, а кулöм Калюшыд оз пет. Медбöрын петiс Галö гöтырлöн Визяньыс.

"А мыйла Галö гöтыр?— эз кажитчы Öпрöсьлы гöтыръясöн мукöдöс нимтöмыс.— Мöскыс сылöн Визянь, а кöзяйкаыс Галö гöтыр. Мöскыслöн ним эм, а Парö ассьыс нимсö воштöма. Мем öд кутшöм нимкодь тöрытнад лои, Öпрöсинняöн шуисны да. Абу Галö гöтыр, а Егор Парö, Парасковья Жижева.

Мöсъяс бöрся петiсны Кладюк, Егор Парö да Петыр Наста.

— Воин, Öпрöсиння? Мое юкталам лок, сэсся удж сетам,— городiс Кладюк.

Унаысь нин Öпрöсь гöгöртлiс колхозса карта гогöр, пытшкас гозмöдысь пыралiс и, нö талунъя пырöм дзик аслыссяма.

Карта — выль, муртса на эштöдöма. Вöчöма нитш вылын, выль керъясысь.

— Шоныд танi мöсъясыдлы,— быд вуджöртiгöн мöвпыштлывлiс Öпрöсь.— Оз кынмыны, и йöвтö унджык сетöны. Видзöдныс весиг любö на вылö.

Уси мöвп вылас аслас картаыс. Быд кер костöд тöв пушкö–шутьлялö, куйöдыс кын му кодь — черöн керавтöг оз шед. Мыйыськö öд Калюшыслöн гöныс весьт кузя волi. Тшыгйыд да кöдзыдыд сэсся и виисны.

Танi и куйöдтö ортсö петкöдöны, карта джоджыс пу, рыт и асыв весалöны. А öшиньяс дзиръяöсь, кор Öпрöсьлöн керка переводас дзиръя öшиньыс абу.

Карта гöгöрыс куйöд чукöръяс. Тувсовъя шондiсянь руалöны.

Мöс юкталанiнысь воöм бöрын Кладюк кутiс висьтавлыны, мый ковмас вöчны Öпрöсьлы.

— Тэнад ки улын лоö дас вит мöс. Наысь колö лысьтыны 50 литр йöв, сэки босьтан öти трудодень. Унджык кö лысьтан — трудоденьыд унджык каяс, а этшаджык кö — чинас. Тэныд кутасны сетны мераöн кöрым. Тэ сiйöс юклан мöсъяслы. Быд мöслöн аслас норма. Бурджыка кö дöзьöритны мöсъястö кутан — найö унджык и лысьтасны, сiдзкö, и тэныд трудоденьыд унджык воас. Öнi мунам да тэ примитан мöсъяс.

Тадзи Кыдъюрова Öпрöсиння лои кöзяинöн дас вит мöс вылын.

И сетiсны Öпрöсьлы Макар гöтырлысь Серöдсö, Иван Öдялысь Сьöдуксö да нöшта дас куим мöскöс. Мöсъяс Серöдъясöн, Сьöдъюръясöн, Калюшъясöн гортаныс волiны, а танi быдöнлöн асланыс ним, и быдöнлысь нимсö пöвтор вылö гижöма да мöс юр водзö лясниас öшöдöма, а Öпрöсь эз куж лыддьыны. Видлалiс пöвторъяс — чукыль–мукыльяс, а код тöдас, мый гижöма: нэмнас кык рыт ликбезö ветлiс да мöд кыкысь гортас велöдны волiсны.

— Мый нин ми коддьöмыслы велöдчöмсьыс,— шуас вöлi велöдысьяслы.

Тöдтöма мöсъяс видзöдлiсны Öпрöсь вылö да турун дорö бöр сунгысисны.

"Тöдмасям! Первойтö öд, дерт, тöдтöмтасны. Кутчысьлыны на кутам",— мöвпалö Öпрöсь аслыс.

Эз и тöдлы, луныс кольны кутiс Велöдчис Кладюклысь кöрым сетавны, отсалiс карта весавны, рытъявылыс мöсъясöс юктавны бара лэччылiс, вый вöчанiнын олыштiс — и гортö мунны лои.

Нимкодя Öпрöсь гортас мунiс. Эз весиг видзчысь сылысь лым пытшкö вöйласьöмысь. Кöтi тыр ва лои.

Босьтiс сырйöсь дора "Югыдлань" книга, кöсйис велöдчыштны да "Коми му озыр вöрöн" кывъясö жö и сувтiс. Тöдö Öпрöсь, мый сэтчö гижöма, унаысь нин сiйöс висьтавлiсны, а шыпасъяс юрас некыдз оз кольны, шырпиян моз котöртöны. Уси мöвп вылас, мый Кладюк мöслöн лясниас дзик жö тайö медводдза шыпас кодьнас гижöма да юрас воис: "тайö, бурако, "к" лоö. Пöлинö, колхоз правлениеын öд татшöм шыпассянь жö гижöма вывескаыс". Гöгыль кодь "о" тöдiс, а коймöд шыпас вылас дöзмис да волiс.

— "Коми",— куйлiгас нин артавны кутiс.— Буракö, "м" сiйö. "Ммм". Лоö аски видзöдлыны, кыдзи Марина мöслöн лясниас гижöма.

3

Мöдлун асылыс эз нин ло мукöд лунся асывъяс кодь. Сiдз жö шондi асыввывсянь кутiс кыпöдчыны, пач трубаясысь тшын сюръяяс кыпöдчисны, а Öпрöсьлы кутшöмкö выльтор пырис пытшкас. Унаысь садьмывлiс, виччысис, оз–ö югды, а югыдыс нарошнö дыр оз во. Мöвпсьыс видлалiс ассьыс мöсъяссö, донъялiс, кодi медуна лысьтö.

"Парöлöн мöсъясыс лысьтанаöсь вöлiны",— мöвп вылас воис.

Арталiс тшöтш, кыдзи аслас Калюшыс лысьтывлiс. Волiс юрас, кыдзи вöв вузалан воö сылöн вöлыс и мöскыс тшыгъялiсны. Вöлыс кок йывсьыс уси, карта стен гöгöрсьыс куйöдсö сёйис, а мöссö медбöръя турун чиръясöн да криста радиöн вердiс. Уна криста ради сэки лэдзис турун ёкмыльяс вылö, сеян няньсö шöриöн Калюшыскöд юкис, вöвсö вузалiс, а мöстö эз эновт. Сiйöн и донасьыс–дона кулiгас кажитчис Калюшыс, быттьö аслас олöмыс дзоньнас куль öти шог сöмын колис.

"Кыдзи нö, пöлинö, трудоденьсьыс? Мöскыд öд оз быдон öтмында лысьтыны. Менам, гашкö, ставыс омöля лысьтысь лоас, а мöдлöн — ставыс бур".

Сиктын пачьясысь сюръяясöн тшын кайö, а Öпрöсь ассьыс пачсö эз ломты.

"Асъя идрасьöм бöрти вола да ломтышта",— аслыс шуис петiгмозыс.

Вöлi водз на. Öпрöсь воис скöтничаяс оланiнö да сэн сöмын стöрöжика Марпа ыджыд ныргорöн узьö, эз и садьмы Öпрöсь пырöм шыас. Мöд мортöн локтiс Иван Öд я — идрасьысь.

— Тэ тай, Öпрöсь, талун водз. Эн на усьлась, регыд тэныд мустöммас тайö,— партукасигмозыс сiйö кутiс кайтны.

— Ме ог уна босьтöм ради. Сетiсны öд мöсъястö да, бура найöс колö видзны.

— Бура нин тан видзасны да. Со öд, ми локтiм, а Кладюкыд узьö на. А мöсъясыд баксöны, кöрым корöны. Прöстö öд куим куканьыд эз кув.

— Кöть öд и сё мöскыдлöн куимыд кулi,— воча сувтiс Öпрöсь.— Тась со куим öтлаысь кулi да тыдалö, а важöн вель уналöн куканьыд вöлi кулас да огö и тöдлö.

Эз, буракö, кажитчы Öпрöсьлöн воча сувтöмыс Иван Öдялы: клёнöдчыны кутiс ведраясöн, весиг Марпа садьмис.

"Мöстöг олысь морттö татчö кöть мед эз нин индыны,— аслыс скöралö Öдя.— На помысь бурыд оз нин ло, эз на матыстчывны унджык мöсъяс дорас да. Сiдз жö öд локтöма да велöдны кöсйö, быттьö прамöй морт".

— Мый нö та воддза?— синсö кутiс гудйыны Марпа.

— Он кö öд водз лок, Öпрöсьяслы трудоденьыд этша каяс,— петiгмозыс шуис Öдя.

— Мый нö талун Öдяыс лоöма? Век на медбöръяöн волывлiс,— дивуйтчыны кутiс Марпа.— Кутшöм пытш сылы талун пырöма? Со, буракö, и мукöдъяс воöны.

Нимкодясьö апрель тöлысся шондi ас югыднас, лым эж выв бисер эшкынöн дзирдалö. Асывлöн нимкодьыс пырö картаöдз. Мöсъяс и то гöгöрвоöны тулыстö. Юны лэччигöн исалöны кушинъяс, оз пырны картаö гож водзысь, а куканьяслöн чаньяслöн моз кокъясныс бринькъялöны. Бöжнысö торгöдöмöн котралöны карта гöгöр. Том вир–яйыд корö вöрöм.

И мöдiсны Öпрöсьлöн лунъяс визувтны тувсовъя моз жö öдйö. Быттьöкöнöсь и шондiыс петавлö, медым сöмын Öпрöсьлы сiдз нин гажа лунъяссö гажöдыштны. Кузьджыкöсь лунъяс овлöны, кор мöвп вылас волас Öдялöн медводдза асывнас Öпрöсьлы кайтасьöмыс. Сэки забеднö лолö аслас вöвлытöм шуд вылö. Забеднö сiйöн, мый нэм олiс да некутшöм шуд эз вöв. Öнi со сьöлöмсяньыс кöсйис уджавны да сэки шуасьöны.

— Мед, колöкö, татчö эз индыны,— шуис бöрвылас аслыс.

Сöмын медым вештыны пуктöм надеясö, нöшта зiльджыка кутiс гöгравны мöсъяс гöгöр, ассьыс нэмöн чöжсьöм мелiлунсö пуктыны налы. Мöсъяс быттьö сiйöс гöгöрвоöны, кок шы сертиыс нин тöдöны сылысь локтöмсö. Первой öти, сэсся мöд да на бöрся мукöд кутiсны унджык йöв сетны. Дас куим лысьтысь мöс кутiсны нин сетны квайтымын литр. Нöшта лёкöсь лоины синъяс Иван Öдялöн.

"Честьö уськöдчö, пуктiсны скöтничаад да. Менö небось век öтдортöны",— лёкало Öпрöсь вылö.

Сiйöн и Öпрöсь мöсъяс дортi лёкджыка весалö, мукöддырйиыс оз чышкысь, Öпрöсьлы лоö сiйöс вöчны. Öтчыд весиг норасис Кладюклы.

— Ладнö, ме сёрнита,— шуис Кладюк.— А тэ эн пов сыысь. Сэсся тэнад, Öпрöсь, эм öти лёктор — он куж йöв вайöмтö мöсъясыдлысь лючкиа пасъявны. Талун тэ дорö культармеечöс ыста да заводит велöдчыны.

"Мыйысь и лöгалö ме вылö Иван Öдяыс?— мöвпалö аслыс Öпрöсь.— Ме сылы нинöм на лёксö эг вöчлы. Ме öд эг тай ачым пуксьы, мед колöкö сiйöс эз чöвтны скöтничасьыс. Бура кö уджалiс— эз небось чöвтны. Меным танi кажитчö уджавныс да ог тон пышйöмöн пышйы".

Унаысь дум вылас усьлö Калюшыс, Митиперыс, став олöмыс. И медыджыд шогöн аслас олöмысь кажитчö Калюшыслöн кулöм. Калюшыскöд быттьö кулiс и олöмыс дзоньнас. Öнi мöсъяс гöгöрын гöгралiгöн унаысь юрас волö мöвп: "Ок, эськö, аслам кö тайö ставыс. Эськö ас керка помынöсь кö тайö ставыс, ас картаынöсь ко". Сöмын сэк жö ыджыдджык мöвп воча сувтас да вевттяс воддзасö: "Гашкö, сэки ставыс Калюш моз кулöны да, гашкö и, олöмыс абу Калюшын да. Вöлi тай вöв да Варлам пи гидняö кайис, мöс — кулi, а выльсö лöсьöдöмыс тöлысь судзöдöм кодь жö. Лоö нин, буракö, кык баляöн нэм коллявны". Шогö усьлö Öпрöсь, кор став олöм туйсö казьтыштас. Кык баляа олысьöдз овмöдчис! Вöлi Митипер, вöлi вöв, мос, баля, а став пыддиыс лоис кык баля.

"Конi шудыс? Тадзтö öд кулан да гортъяд куйлiгöн забеднö лоö ас олöмыд вылö,— медбöрын шуас.— Дай Калюшын–ö шудыс?"

Унатор йылысь мöвп кайлас, унакöд окота сёрнитны. Унджыкысь кутiс ветлыны собраниеяс вылö, кывзыны сэсь сёрнитысьяслысь.

Öпрöсь нэм чöжыс чайтiс, мый быд мортлöн эм аслас горт, аслас керка–карта, мöс–вöв, ыж–баля, аслас эмбур, конi мортлöн став шылльö–мылльöыс чукöртöма. И ковмас кö кытчöкö мöд местаö вешйыны — ставыс найö кутасны вöтчыны кузь бöжöн. Дай став олöм чöжыд тайöяс кузь бöжöн вöтлысьöны. Сэтшöм бöжöн, кодöс некытчö некор оз позь кольны. И тайö бöжас мортыс ачыс ставнас: аслас уджнас, олöмнас, сямлуннас, зiльлуннас да овны кужöмлуннас.

А öнi кутiс тыдовтчыны, мый мортлöн олöмыс абу тайö бöжас, а кытöнкö мöдлаын. Тайö бöжыс весиг кыскö вöлöм мöдарö. Оз лэдз мунны сэтчö, кытчö тэныд колö, оз лэдз овны ас окотасьыд, кыдзи тэныд колö, кыдзи сьöлöмсяньыд кöсъян эськö овны. Нэмыд тайö бöжсö видзöм могысь и лоö мырсьыны, пöсь кисьтны, вын бертны, лысьöм жугöдлыны, синва кисьтны, кытчöдз мукöдъяс татшöм жö бöжöн оз öвтыштны да уланыс сюркнявны, кыдзи Öпрöсьöс сюркнялiсны.

Сьöкыд кажитчылiс Öпрöсьлы ставсö тайöс казьтывны. И медым сiйö мöвпъяссьыс мездысьны, пыралас Кладюк дiно, мукöд скöтничаяс дiно.

4

Медгажа кад скöтничаяслöн лун шöр гöгöр. Мöсъясöс вердöма–юкталöма, лысьтöма, весалöма, асъя йöв сдайтöма. Рытъявылöдз мыйкö дыра прöстöсь. Тайö кадас сёрнияс, венъяс, ошйысьöм да мöда–мöд вылö вештасьöм.

— Тэнад, Парö, кымын литр лои?

— Кызь кöкъямыс. А тэнад?

— Менам этша. Кызь квайт.

Тайö кадас мöсъясöс ёна сутшиктöдлывлö. Быд мöскöс казьтывласны. Кодöс лёкöн, кодöс ошкöмöн — быдöнлы мыйкö мындаöн сюрö.

— Этша? Менам кызь кыкысь вылö эз на кайлы. А рытнад кызьыс муртса лолö,— норасьö Настасся.

— Лёка, сiдзкö, видзан,— шыасьö Кладюк.— Öпрöсьлöн со талун на комын кык литр.

— Сылöн öд мöсъясыс бурöсь.

— Некутшöм бур абу. Бура видзö, сiйöн и уна вавайöны.

— Менсьым бара кöть кыдзи видз, таысь уна оз вайны. Трудодень некутшöм лунö на эз кайлы.

— Мыйла нö Иван Öдялöн сiйö жö мöсъясыс комынсö некор эз сетлыны, а Öпрöсьлöн сетöны? Бура дöзьöритöм сайын. Тiян кöрымныд таляссьö, лёка вердад...

— Öпрöсь öд уна кöсйö куравны да...

— Мыйла куравны? Радейтö мöсъясöс да сьöлöмсянь уджалö. Кöрымыд сылöн оз öбледясь.

А Öпрöсьлы нимкодь, мый сы йылысь сёрнитöны, важöн зато уна серавлiсны. Не век жö öд öтарö.

— Оз ков сiдз–тадз видзöдны удж вылад. Сiдз нин ми планнымöс огö тыртö. Мый вöсна? Чайтад, мосъяс оз вермыны сетны? Огö на бурасö видзны найöс кужö, вот мый...

— Вернö, Кладюк,— торкис Парö,— нинöм лёкавны Öпрöсь вылö, бура кö сiйö уджалö. Морт зiля уджалö, а ми сiйöс видам.

— Сiйö и эм, бабаяс. Миянлы тешкодь кажитчö трудоденьтö öнiя ногöн арталöмыд. Чайтан, мый тадзинад оз ло лючки. Öпрöсинняыд со петкöдлiс пример. Миянлы колö ставнымлы сiдз уджавны. Вердчöмыд миян вывтi на лёк, таскайтöм кöрымтö. Норасям этша турун вылö, а асьным ог кужö вердчыныс. Мöскыдлöн öд йöлыс кыв йылас.

А картаын уджыс збыль эз вöв зэв бур. Мöвп вылас воис Кладюклы, кутшöма вöлi мöсъясöс видзöны, кор сiйö татчö локтiс. Быд скöтничалысь удж арталöны мöс лыд серти. Кутшöма видзöны — оз артавсьыны. И медсьöкыд торйöн Кладюклы лоис йöв вайöм серти удж арталöм. Эз öд весьшöрö Кладюк вöв курс вылын, эз весьшöрö куим тöлысь велöдчы. Ыджыд зыкöн мунiс медводдза производственнöй совещание.

— Кыдзи йöв лыд серти? Менам кö став мöскыс сувтас?

— Кыдзи быд мортлы öткодь мöссö сетан?

Зыкöн, нö лои венны. Сэк жö Иван Öдяöс лёка уджалöмысь лои вештыны скöтничаысь идрасьысьö. Выль йöзöс вайисны мöсъяс дiнö. Öпрöсьöс тшöтш и.

Öнi на весиг важыслöн дукыс абу дзикöдз бырöма.

— Ме и шуа, бабаяс, мый миянлы колö кыпöдны удж. Кымын уна государстволы вый сетам, сымын уна и сiйö миянлы кутас сетны...

— Мс, Кладюк, пета панласьны Öпрöськöд,— бара на торкис Парö.— Ударничаöн лоа.

Надзöник, нö мунö водзö удж. Сiйöн и нимкодь Кладюклы. Нимкодь сiйöн, мый картаас удж бурмö, мöсъяс мичаджыкöсь лоöны, а колхозса юралысь быд лун ошкö:

— Бур, бур, Кладюк. Регыд быд лунъя план кутам тыртны.

— Тыртам, Ёгорьевич. Ми нин мыйкö огö вöчöй помöдз! Эг на шöрас некытчö сувтлывлöй.

5

Чöскыдöсь тувсовъя войяс. Нöшта нин чöскыдöсь татшöм войясыс кажитчылiсны Öпрöсьлы том дырйиыс. Пуксяс вöлi рытйысьöм бöрад ас жытник водзаныс да мöвпавны кутас. Мöвпалö, кыдзи коркö сiйö кутас том зонмöс радейтны. Зонмыс лоö ён, паччöр кодь морöса, восьса синьяса, вына сойяса. Вермасны бара сэтшöм сойясыд уджавныд. Кутлас зонмыд да сьöлöмыд вöрöмсьыс дугдылас. Сэсся верöс сайö сiйö зонмыс сайö Öпрöсь мунас, выль керка лэптасны, вöв лöсьöдасны да сэтшöма овмöдчасны, мый мукöд вежалöмпырысь кутасны кайтны:

— Со öд кутшöма Öпрöсинняыд овмöдчис! Чассьö жö, сэтшöм мужикыд сайö мунiс да.

И став тайö мöвпъясыс мöдар путкыльöн путкыльтчисны. Некод сэтшöм кывъяссö оз шу. Некытчö дай нинöм вылö вежавныс. Важ керка пöв вылад öмöй да сiсь стын вылад вежалан?

Уси тайö ставыс тöд вылас да петiс карта пос вылö. Сэтшöм жö еджыд вой, кыдзи и дас сизим во сайын. Сöмын сэки сикт горулас эз вöвлы ыджыд картаыс, конi олö кöкъямысдас мöс, код пиысь Öпрöсь киын дас вит, да турун лэптан поскыс Чибльöга шор пос кузя жö кузь. Эз вöвлы эськö эсiйö выль гидняыс, эз вöвлы тонö муртса тыдалан выль школаыс, кресттöм вичко юрыс. Эз вöвлы и машинаяс видзан эсiйö сарайыс. Эз вöвлы вый заводыс, кыдз сiйö... сепараторыс да маслобойкаыс. Кутшöм али сэки машинаяс видзанiн, став сиктас кö сöмын Варлам пилöн вöлi вурсян машина.

Талун Марпа пыдди Öпрöсь кольччис вой узьны. Мый öд керан, окота лоöма мортлы гортас узьны да.

Эзысь тасьтiöн öшйöма сикт весьтö тöлысь. Ыджыд сярикöн пöшти тöлысь дорöдз кайöма важ вичко юр. Вöсньыдик бедь пöлöн йылас нюжöдчöма флаг. Весиг сылöн гöрдыс тöдчö тöлыссянь. Сэтшöм лöнь, мый лолалöмсо мöсъяслысь кылö Öпрöсь.

"Мый и ме лёксö вöчи Иван Öдяыслы?— бара мöвп вылас воис кодкö лунъя сёрниясыс.— Ме татчö эг вöзйысь, ог аслым лысьты. Аттьö кöть Кладюклы, быд здук дорйö да. Мед нö и сакö, сы вылö ме ог жö видзöдлы–а. Ачыс эз куж уджавныс да ме вылын лёксö кöсйö песны".

Кылö, кутшöмкö мöс надзöникöн ымöстiс.

— Мый нö тайö? Парö мöслöн куканясян кад волi, а ачыс нинöм эз висьтав. Колi жö öд висьтавны.

Кылö, мöдысь ымöстiс сiйö жö мöскыс.

Мунiс куйлысь мöсъяс дiнтi мöдар помас, лэдзис гöрд сера мöссö гез йылысь.

Мам синъясöн видзöдлiс Öпрöсь вылö мöс. Сэтшöм корана синъясöн, кутшöмöс Öпрöсь некор на эз аддзыв.

— Мый нö зöлöтаыслы колö? Мый нö аканьыслы колö? Мый нö донаысы колö?— пакъяссö малалiгтырйи кутiс кайтны Öпрöсь, а аслас неуна синваыс оз пет.

Мöслöн пакъясыс пöльтöм гадь кодьöсь. Öпрöсь личкыштiс да быдсöн ружтыштмöн мöслы лои — нора–нора бакöстiс, быттьö ассьыс мамсö корис.

— Мый нö зöлöтаыслы колö?— бöрдöм сорöн нин шуис Öпрöсь, а ачыс котöртiс öдзöслань. Сöмын пыр жö бöр бергöдчис да лэптiс мöслысь бöжсö...

...Ачыс Öпрöсь омöля тöдö, мый сэсся волi. Помнитö, быттьöкö кинас тшöтш кыскис, малалiс пакъяссо, ниртiс кынöм увсö. Кывлiс, кыдзи тшöтш мукöд мöсъяс бакöстлiсны. Кор нин ставыс ланьтiс да Öпрöсь асас воис — мöс зэв зiля вöлi нюлö ныр улас куйлысь гöрдов сера куканьöс. Малыштны кöсйис куканьсö, нö мамыс нырнас вештiс сылысь кисö.

Петiс карта водзö — асыв...

Медводз локтiс Кладюк.

— Нинöм эз вöв?— юалiс.

— Машкаыд кукпи вайис.

— Чöв? Некодöс эн корлы? Колi öд менö чукöстны...

* * *

Лун шöр гöгöрын правлениеысь воис Кладюк.

— Öпрöсиння? Правление шуис тавойся кукпитö тэныд сетны премия пыдди бура да сьöлöмсянь уджалöмысь. Ачыд танi быдты, мöсъястö видзигмоз, бура дöзьöрит, мед ён мöс лоö. Мый нö тэ? Оз–ö синва пет, Öпрöсиння? Мый нö тэ? Мыйла нö бöрдан? Мый нö, Öпрöсиння?

— Нинöм... ме... сiдз...

— Кысь сiдз, бöрдан да. Мый нö лои?

— Ме... радöйла... зэв нин тэ, Кладюк, бур...

— Абу, Öпрöсиння, ме бур, а ми бурöсь. А тэ эн бöрд. Эштылiн нин öд нэм чöжнад бöрднытö.

— Сiйö и эм... Рад лои, а важ синваясыс мöвп вылö воисны да öнi радöйла петiс...

...И ставыс тайö заводитчис колхозса собрание вылын...

1932.