Komi Zyrians Traditional Culture

КОМИ КУЛЬТУРА ГРАММАТИКА СЛОВАРИ ЛИТЕРАТУРА МУЗЫКА ТЕАТР ЭТНОГРАФИЯ ФОТОАРХИВ КНИГИ

Висер вожса сьыланкывъяс да мойдкывъяс. Лӧсьӧдіс И.А.Осипов, 1986. Серпасъяс: Аркадий Мошев.

СЕДУН · Коми Мойд

О
О

ліс-выліс крестьянин. Крестьянинлӧн вӧлі куим пи. Медыджыдыс Василей, мӧдыс Педӧр, коймӧдыс, медічӧтыс Иван. Иван сія седун, пач-чӧр сэрӧгысь оз и лэччыв некор, пукалӧ сэн да сёй пиын лувасьӧ. А кыкыс абу йӧйяс, ная прӧсужъяс.

Но, коркӧ, бать висьмис, омӧльтчис зэв ёна и пондіс кувны. Сія корис пиянсӧ и шувӧ, но пӧ, пиян, ме пӧ, буракӧ, кувны куті, ог нин справитчы. Ті пӧ менӧ дзебӧй, гувалӧй кулӧм.мысьтӧн, а сэсся пӧ куим вой волӧй, первой Василей, сэсся Педӧр, сэсся пӧ тэ волы, Седун.

Но, бать налӧн кулі, дзебисны, меститісны, и рыт вовис, кайны талун узьны бать гу вылын медыджыд пилы. Медыджыд пи, Василей, и шувӧ, он-ӧ пӧ тэ кай, Седун, узьны ме пыдди батьыд гу вылын, ме пӧ тэд ньӧба гӧрд дӧрӧм. Кая ііӧ, шувӧ Седун. Гӧрд дӧрӧмыд сылы кажитчис, любӧ весиг. Зэв зіля сэсся и тімбыльтіс, кайис.

Бать гу вылын узис, батьыс сетіс зэв мича гӧрд вӧв. И лэччӧдіс сія вӧвтӧ, лэдзис шорӧ, а ачыс бӧр кыссис гортӧ.

Мӧд вой узьны колӧ шӧркост воклы. Рыт пондіс воны, шӧркост вок шувӧ, тэ пӧ, вокӧ, он-ӧ кай узьны ме пыдди, ме вурӧда тэныд выль сапӧг гоз. Кая пӧ, шувӧ Седун. Сылы эськӧ нинӧм и сапӧгсьыс, оз ветлыв некытчӧ да, колӧ жӧ вот вӧччыныд. Зэв любӧпырысь и кайис. Ӧпеть узис сія бать гу вылын, бать сетіс серӧй вӧв. Седун лэччӧдіс и ӧпеть лэдзис шорӧ.

Коймӧд вой воны кутіс, кайны колӧ Седунлы. Но пӧ, талун пӧ, аслым узьны черӧд, оз нин ков дон босьтны некодлысь. Кайис и ӧпеть узис бать гу вылын. Бать сетіс сылы зэв мича воронӧй вӧв. Седун ӧпеть лэччӧдіс и шорӧ лэдзис вӧлӧс.

Но, эстӧні, эстӧні ылын эм сар, а сарлӧн эм куим ныв: Марья, Василиса и Марпида. Ная бӧрйӧны рӧвесникӧс мужик вылӧ. Сар сетіс нывъяслы шӧвк чышъянъяс. Ӧтилӧн мича-мича, мӧдлӧн сыысь мича, а меддзӧляыслӧн, Марпида Саревналӧн, ещӧ на мича, би моз ӧзйӧ, видзӧдан да. Но, аски ӧшӧдӧны балкон вылӧ медыджыд нывлысь чышъян. Коді сійӧс судзӧдас, сійӧ и ловӧ жӧникпу. Став сарствоас явитӧма, быд помысь йӧз локтӧны, чукӧртчӧны. И кык вокыд Седунлӧн тшӧтш мӧдӧны, ветлам пӧ, гашкӧ, и миянлы пӧ сюрас. Седун шувӧ, менӧ пӧ, вокъяс, он-ӧ тшӧтш босьтӧ. Вокъяс толькӧ сералісны, чӧв пӧ, йӧй, кытчӧ пӧ мунан, пукав пӧ паччӧр сэрӧгад. Сэсся доддялісны омӧлик кыскасян вӧв-кляча, пуксисны доддьӧ и мунісны.

Но, вокъяс мунісны. Седун сія лэччис шорӧ, кыссис бауӧн, чукӧстіс первойя вӧвсӧ, гӧрдсӧ, и пырис пеляс. Ӧтар пеляс пывсяс, мыссяс, мӧдарас кӧмасяс, пасьтасяс и петас сэтшӧм ён, мича молодеч!



Но, сэсся пуксис вӧв вылӧ, вӧлӧн кутіс лэбны. Регыдӧн и сувӧдіс вокъяссӧ: кыскасян вӧвнад ылӧ абу на мунӧмась. Сувӧдіс и вӧв вывсянь швач кучкис пель бокас ӧтилы, швач' кучкис мӧдыслы, ная усины пидзӧс вылас. Свят, свят, шувӧны, Илля великӧй пӧ муніс. А Седун сія ылын нин водзын лэбӧ. Лэбыштіс сар дом дорӧ, гашкӧ, балконсьыс на вылӧджык чеччыштліс и толькӧ исыштіс, эз босьт чышъянтӧ. Йӧзыс видзӧдӧны да дивуйтчӧны, со пӧ, со, вермӧ да оз на и босьт ещӧ. Дерт, кодкӧ сэсся судзӧдіс жӧ бӧрын. А Седун бергӧдчис бӧр да вокъяс век на мунӧны, паныдасисны. Сія ӧпеть ӧтиыслы швач кучкис, мӧдыслы швач кучкис. Ная ӧпеть усины пидзӧс вылӧ, свят, свят пӧ, шувӧны, Илля великӧй пӧ ӧпеть муніс, миянӧс страститіс.

Коркӧ-й вокъяс вовисны гортӧ. Седун паччӧрын нин куйлӧ. Сія, дерт, важӧн нин удитліс воны, лэдзис вӧвсӧ шорӧ, а ачыс бӧр лови Седун.

— Но, вокъяс, кыськӧ-мыйкӧ аддзылід энӧ, кывлід энӧ?— ювалӧ вокъяслысь.

— Эгӧ пӧ аддзылӧ, шувӧны ная, кодікӧ пӧ босьтӧма нин, эз миянлы сюр. Толькӧ пӧ Илля великӧй гымаліс, страститіс миянӧс зэв ёна.

— А ме пӧ тай нинӧм эг кывлы-а, некутшӧм гымалӧм, ме моз кӧ пӧ пукалід гортын, бурджык эськӧ вӧлі,— шувӧ Седун.

Мӧдлун шӧркост ныв лэптіс чышъян. Вокъяс ӧпеть шувӧны, ветлам пӧ и ми, гашкӧ пӧ талун миянлы сюрас. Седун ӧпеть вӧзйысьӧ, менӧ пӧ, вокъяс, он-ӧ тшӧтш босьтӧй. Вокъяс бара сералісны, чӧв пӧ, йӧй, кытчӧ тэ мунан, куйлы пӧ паччӧрад, сійӧ тӧд. Сэсся доддясисны и мунісны, кыскасян вӧлӧн, клячан. А Седун лэччис, чукӧстіс мӧд вӧвсӧ, серӧйсӧ, и ӧтар пеляс пывсяс, мыссяс, мӧдарас кӧмасяс, пасьтасяс, сэтшӧм мича да ён молодеч лови. Вӧв вылӧ пуксис и пондіс мунны. Регыдӧн и сувӧдіс вокъяссӧ, ӧтиыслы бара швач кучкис, мӧдыслы швач кучкис, ная бара пидзӧс вылӧ усины, свят, свят, шувалӧны, Илля великӧй пӧ муніс, миянӧс страститіс. А Седун вовис балкон дорӧ, чеччыштліс и ӧпеть толькӧ исыштіс чышъянсӧ, эз босьт. Йӧзыс дивуйтчӧны, со пӧ кутшӧм, вермис пӧ да эз на и босьт ещӧ.

Бергӧдчис бӧр, а вокъяс век на мунӧны. Ӧпеть налы швачйӧдліс, кучкаліс пель боканыс, ная усины пидзӧс вылас, свят, свят пӧ, Илля великӧй муніс, миянлы страсьт петкӧдліс.

Коркӧ-й сэсся гортӧ вовисны, Седун ий ювалӧ:

— Но, вокъяс, талун сюри эз?

— Эз миянлы сюр, кодкӧ босьтӧма нин,— шувӧны вокъяс,— толькӧ,— шувас,— Илля великӧй гымаліс, миянлы страсьт петкӧдліс.

— А ме тай,— шувӧ Седун,— нинӧм эг кывлы-а, ме моз кӧ пукалід гортын, некутшӧм страсьт эз лолы.

Коймӧд лунӧ Марпида Саревна чышъян лэптіс, меддзӧля чойыс. Иӧз чукӧрмӧма став сарствосьыс, быдӧн жалайтӧ судзӧдны. Вокъяс шувӧны, ветлам пӧ и ми, талун пӧ, гашкӧ, сюрӧ нин. Седун ӧпеть вӧзйысьӧ, талун, шувас, ме ог нин кольччы, ме пӧ ветла жӧ сідзкӧ, ті кӧ надейтчад. Сэсся петіс да медводз и пуксис доддяд. Вокъяс сералісны и матькисны, да Седун эз чеччы. Но, ладнӧ пӧ, шувӧны вокъяс, сэсся нувисны да шорад и пӧрӧдісны Седунӧс. Сералісны, сералісны дай мунісны, а Седун коли. Но, и тая пӧ ладнӧ, шувӧ Седун, кӧть пӧ татчӧдз вайисны, эз ковмы кыссьыны аслым. Чукӧстіс коймӧд вӧвсӧ, аслыс сетлӧмсӧ, ӧтар пеляс пырис, пывсис, мыссис, мӧдарас кӧмасис, пасьтасис, сэтшӧм молодеч лови, ён да мича. Вӧв вылӧ пуксис и лэбыштіс вӧвнад. Вокъясӧс сувӧдіс да ёна и клопӧдіс-нӧйтіс, вот пӧ тіянлы пӧрӧдӧмсьыд. А ная усины пидзӧс вылас, свят, свят пӧ, Илля великӧй пӧ муніс, миянӧс ӧпеть страститіс.


Сар балкон дорӧ вовис Седун, чеччыштіс вӧвнад. Сія, зонмӧ, гашкӧ, керкасьыс на вылӧ воліс и лэччигас вӧлись босьтіс чышъянтӧ Марпида Саревналысь. О, кутлӧ, кутлӧ, код пӧ татшӧмыс, горзӧны йӧз, а кыдз сія кутан, сія йӧз юр вывтіс лэбӧ да.

Бӧр локтігас паныдасис вокъяскӧд, ная ещӧ мунӧны на, и бара швачйӧдліс-кучкаліс. Ная усины пидзӧс вылӧ, свят, свят, шувӧны, Илля великӧйыд пӧ бара страститӧ миянӧс. Коркӧ сэсся, ная ветлӧмась дай, бӧр локтісны гортӧ. Седун паччӧрын нин.

— Аски, Седун, тшӧтш мунам,— шувӧны вокъяс.

— Но,— шувӧ Седун,— менӧ корисны али мый?

Аски пӧ синтӧм и, коктӧм и, ставыс должен локны сарство пасьтасьыс. Сар нывъяс пӧ кутасны корсьны йӧз чукӧрысь ассьыныс жӧникъясӧс.

Ладнӧ пӧ, шувӧ Седун, ветла пӧ, талунъя моз кӧ он пӧрӧдӧй. А тіянлы пӧ талун сюри эз, ювалӧ вокъяслысь.

Эз пӧ, эз сюр миянлы, шувӧны, толькӧ пӧ Илля великӧй бара страститіс, татшӧм страсьтсӧ пӧ эг на аддзылӧй ещӧ.

Гортын кӧ пӧ олід ме моз, бурджык вӧлі, шуыштіс Седун.

Но, узисны ная, аски рӧмыднас на ӧти вокыд и садьмас, мый нӧ пӧ тая, ӧзйӧма тай нӧ керканым. А сія эськӧ Седунлӧн узигас питшӧгсьыс чышъян помыс мыччысьӧма.

— Вокӧ, вокӧ,— пондіс чуксовны,— Седуныд ӧзтӧма керкатӧ, пач-чӧрад биасьӧма да.

Но, Седун ӧдйӧджык бӧр сюйыштіс чышъян помтӧ — пӧжар кусі. Вокъяс чеччылісны жӧ эськӧ да, би эз аддзыны. Сэсся-й, коркӧ югдіс да, вокъяс доддясисны, босьтісны Седунӧс тшӧтш и мунісны сар ордӧ.

Быд помысь локталӧны йӧз, коді вермӧ и оз, синтӧмыс и Коктӧмыс, гӧльыс и озырыс. Лун шӧр кежӧ ставыс нин чукӧртчис, некод эз коль гортӧ. Седун кутіс пырны, зырым и дуль ӧтлан, кыссьӧ бауӧн. Тайӧ пӧ мыйла нин вайны, тайӧ; тайӧ пӧ вӧд абу жӧ нин жӧникпу, шувӧны йӧз. А сар шувӧ, нет пӧ, ставыс пӧ должен локны, некод пӧ мед эз коль бокын.

Сэсся сар сетіс медыджыд нывлы вина стӧкан. Кытшӧвт пӧ йӧз пӧвсттіс, код ордысь пӧ аддзан ассьыд чышъян, сійӧ пӧ и юктов, сэсся пӧ пуксьы водзас, сія пӧ тэнад жӧникыд. Но, ыджыд ныв пондіс кытшовтны, пыр и аддзис ассьыд чышъянтӧ. Коді вӧд судзӧдіс, сія оз кут дзебны. Но, батьӧ, менам пӧ сюрис, шувӧ нылыд, сэсся юктоліс жӧникӧс стӧкан винан и пуксис сылы водзас.

Бать сетіс стӧкан вина шӧркост нывлы, сідз жӧ пӧ кытшовт да код ордысь аддзан ассьыд чышъян, сійӧс пӧ и юктов да пуксьы водзас, сія пӧ и тэнад жӧникыд. Шӧркост ныв пондіс кытшовтны, ӧпеть сылы регыд и сюрис. Мен пӧ, батьӧ, сюрис жӧ, горӧдіс батьлы, сэсся юктоліс да пуксис жӧник водзӧ.

Но, сэсся бать ыстӧ коймӧд нылӧс, Марпида Саревнас, вай жӧ пӧ кытшовт, шувӧ, вина стӧкан пӧ босьт да, код ордысь пӧ аддзан ассьыд чышъян, сія пӧ и ловӧ тэнад жӧник. Марпида Саревна кутіс кытшовтны. А Седунлӧн питшӧгсьыд тыдӧдыштӧма жӧ, абу ёна, а муртса йылыс. Марпида Саревналы зэв яндзим лови дай быттьӧ оз аддзы, кытшовтіс и бӧр локтіс. Эг пӧ аддзы, шувӧ батьлы. А бать шувӧ, мӧдысь пӧ кытшовт, кыськӧ пӧ аддзан на, сійӧ пӧ тан должен лоны, бокын пӧ абу сэсся йӧзыс. Сія сэсся ӧпеть кытшовтіс, Седун дорті эськӧ-й муніс да бара быттьӧ эз аддзы, вайис вина стӧкан бӧр, пуктіс пызан вылӧ. Эз пӧ, батьӧ, сюр, ог пӧ тӧд, кӧні менам чышъяныд. А бать и скӧрмис:

— Неужели,— шувӧ,— эз сюр? Тэ, шувӧ, ылӧдлан, омӧль кӧнкӧ да яндысян, ветлы,— шувӧ,— да босьт, кӧть коді.

Коймӧдысь нылыд эз нин кытшовт, мыйла нӧ кытшовтас, тӧдӧ нин да. Веськыда муніс Седун дорӧ, юктоліс винан, носӧвӧй чышъянӧн чышкаліс сылысь зырым-дульсӧ и пуксис дінас. Водзӧ пуксьыны оз позь, а дінас пуксис. Иӧз сэні ставыс серовны кутісны. Сюри пӧ, ювалӧ сар, кыліс серамтӧ да. Сюри пӧ, шувӧ Марпида Саревна, ачыс юрсӧ лэптыны оз лысьт, яндзим да.

Сар сэсся аддзас жӧникӧс:

— Тьпу,— шувас,— сюрӧма жӧ!

Торъя кукня(ӧ) и мӧдӧдіс, порсь да мӧс видзанін ли мый ли сэн вӧлӧма. Пируйттӧг ни нинӧм, сідзи и ыстіс, мун пӧ син водзысь. А кык зятькӧд пируйтӧны зэв ёна. И ми сэтӧнӧсь жӧ вӧлім, сёйим, ювим. Ме сэсся пыри и куті висьтоны сарлы, эстӧн, эстӧн, меся, зарни сюра лань эм, поле вылын ветлӧдлӧ, зэв ӧдйӧ котралӧ. Коді вермас сійӧ кутны, вот сія морт кутас лыддьысьны.

А сар и шувӧ, но пӧ, зятьяс, петкӧдлӧ ассьыныд морттуйтӧ. Вот пӧ эстӧн, кывсьӧ, зарни сюра лань эм, ветлӧ пӧ да кутӧ сійӧс и вайӧ татчӧ.

Ветлам пӧ, шувӧны зятьяс. Босьтісны гезъяс, сюмыс вӧжжи ли мый ли, и мӧдӧдчисны мунны. А Седун шувӧ аслас гӧтырлы:

— Вай,— шувӧ,— петов бать ордад, ва кыскалан кӧбыласӧ корлы, ме тшӧтш жӧ ветла, ме вӧд зять жӧ.

Марпида Саревна петіс и корӧ.

— Мун,— шувӧ сар,— кутшӧм вӧв сылы ковмис, Седунлы, мед луттшӧ пукалас гортас, йӧзыслысь кӧть серамсӧ оз петкӧдлы.

А саритса ий шувӧ:

— А жаль али мый тэд кӧбылад, мый он сет, вай сет.

Мамыдлы вот жаль жӧ нылыд, сы дор олӧ. Но, сар сетіс ва кыскалан кӧбыла, зэв омӧлик сія, лыыс да кучикыс сӧмын. Седун сія петіс да бӧрӧн и пуксис кӧбыла вылад. Бӧжсӧ курччис вомас, ки пыдӧснас шлапкӧдӧ задъясас и мунӧ. А йӧзыс сэні, пируйтысьясыд, со, уна вӧлі; зэв ёна пондісны ная серовны. Видзӧд пӧ, видзӧд, горзӧны, Седун зятьыд пӧ тшӧтш мӧдӧма, вӧв вылас бӧрӧн пуксьӧма. Вот пӧ тая и кутас зарни сюра ланьтӧ! А Седун сія пыр муніс и муніс, пыдди оз пукты сералӧмтӧ, и вовис аслас шорӧ. Кӧбылас бӧжӧдыс босьтіс, тракнитіс, яйыс ылӧ туті, а кучик коли киас. Сія сэсся ӧшӧдіс кучиктӧ потшис вылӧ и чукӧстіс ассьыс вӧвсӧ. Локтіс первойяыд, гӧрдыд, ӧти пеляс пырис, пывсис, мыссис, мӧдас кӧмасис, пасьтасис и сэтшӧм молодеч лови, ок кутшӧм! Вӧв вылӧ пуксис, свӧякъясӧс сувис, ӧтилы швач кучкис пельбокас, мӧдыслы швач кучкис и лэбис водзӧ. Ная толькӧ усины пидзӧс вылас да, свят, свят пӧ, шувалӧны, Илля великӧй пӧ миянӧс страститӧ.

А Седун ветліс поле вылӧ, кутіс ланьтӧ и бӧр нин локтӧ. Свӧякъяс век на мунӧны, паныдасисны. Тэ пӧ тай нӧ, молодеч, локтан нин, ваян, а ми пӧ тайӧ мунам кутны, шувӧны ная. А менам пӧ кутӧма нин, шувӧ молодеч. А тэ пӧ он-ӧ вузов миянлы, ювалӧны сылысь. Вузала пӧ, шувӧ сія. А уна-ӧ пӧ коран. Ыджыд кок чуньястӧ пӧ вундӧ да вайӧ меным, ме пӧ тіянлы лань сета. Свӧякъяс думайтісны, сэсся и вундісны ыджыд кок чуньяссӧ, сетісны молодечлы. Молодеч босьтіс, зарни сюра лань сетіс и муніс.

А ная, кык свӧяк, сар ордӧ мунісны. Нимкодьыд сарлы! Ещӧ ёна кутіс пируйтӧдны найӧс, вот пӧ ті, зятьяс, эстшӧм звер вермид кутны. Седуныд пӧ кытчикӧ мунліс жӧ, энӧ пӧ аддзылӧ? Эгӧ пӧ, шувӧны зятьяс, и мӧда-мӧд вежмӧн ошйысьӧны сар водзын, кыдзи найӧ куталісны зарни ланьӧс.

Коркӧ-й дыр мысти Седун локтӧ. Шорӧдзыд нин ветлӧма да бӧрсӧ локныд дыр лови. Сія, зонмӧ, вӧв яй вывсьыд куталӧма катша-ракаясӧс, гашкӧ, дасӧс вайӧ, кыскӧ:

— На,— шувӧ,— тесьт-тьӧща, гӧстинеч вайи.

Серамыд сэні!

— Тьпу,— шувас сар,— дворечсӧ менсьым пейсалан, мунӧ,— шувӧ слугаяслы,— кытчикӧ шыбитӧ ӧдйӧджык йӧз водзсьыс.

Седун бара баба дінӧ тімбыльтӧ-мунӧ, пызан дорӧ весиг эз корны.

Сэсся-й ӧпеть ме пыри да висьталі, эстӧн, эстӧн, меся, эм зарни тшӧтя порсь. Сар и шувӧ зятьяслы. Но, пӧ, зятьяс, эстӧн, эстӧн пӧ кывсьӧ зарни тшӧтя порсь. Сія кӧ пӧ вермад вайны меным, вот пӧ и бур зятьяс лованныд, нэм пӧ ог вунӧд.

Ладнӧ пӧ, шувӧны зятьяс, ветлам. Кокъясыд эськӧ висьӧны да, бур зятьясӧн лоны ещӧ окота. Босьтісны сюмыс вӧжжи ли мый ли и мунісны.

А Седун бабасӧ ӧпеть ыстӧ:

— Мун, Марпида Саревна, ветлы да корлы меным мӧд кӧбыласӧ, ме тшӧтш ветла зарни тшӧтя порсьыдла, ме вӧд сар зять жӧ.

Марпида Саревна муніс батьлысь корны вӧв, а бать шувӧ, ог пӧ сет, ӧтиӧс пӧ сетлі нин да страмитіс став йӧз водзас. Саритса ӧпеть ныв дор сувтіс, жальыс петіс, мый нӧ пӧ жалитан ва кыскалан кӧбылатӧ, сет пӧ вай. Но, сар сэсся сетіс жӧ, венісны кыкнад.

Седун пуксис кӧбыла вылӧ бокала и ӧпеть мунӧ, восьлӧн и мунӧ. Видзӧд, видзӧд пӧ, горзӧны да сералӧны пируйтысьяс, Седуныд пӧ ӧпеть мӧдӧма, а ӧні пӧ лӧсьыдджыка нин пукалӧ, велалыштӧма. Тая пӧ бара кутас нин порсьтӧ. А Седун найӧ пыдди оз пукты, мунӧ и мунӧ. Шорӧ вовис, а кӧбылас кватитіс бӧжӧдыс да тракнитіс, яйыс ылӧ туті, а кучиксӧ потшис вылӧ ӧшӧдіс. Сэсся чукӧстіс ассьыс мӧд вӧвсӧ, ӧти пеляс пырис, пывсис, мыссис, мӧдас кӧмасис, пасьтасис, ӧпеть зэв ён да мича молодеч лови. Сейчас сійӧ свӧякъясӧс сувӧдіс да швачӧдіс-кучкаліс пель бокас. Ная толькӧ шувалӧны, свят, свят пӧ, ӧпеть пӧ Илля великӧйыд страститӧ миянӧс.

А Седун ветліс и кутіс зарни тшӧтя порсьӧс.

Бӧр локтігӧн паныдасисны свӧякъяс.

— Тэ тай нӧ ваян нин, молодечӧ, ми мунам кутны-а? Он-ӧ тэ вузов миянлы?— ювалӧны сылысь. молодеч. А тэ пӧ он-ӧ вузов миянлы, ювалӧны сылысь. Вузала пӧ, шувӧ сія. А уна-ӧ пӧ коран. Ыджыд кок чуньястӧ пӧ вундӧ да вайӧ меным, ме пӧ тіянлы лань сета. Свӧякъяс думайтісны, сэсся и вундісны ыджыд кок чуньяссӧ, сетісны молодечлы. Молодеч босьтіс, зарни сюра лань сетіс и муніс.

А ная, кык свӧяк, сар ордӧ мунісны. Нимкодьыд сарлы! Ещӧ ёна кутіс пируйтӧдны найӧс, вот пӧ ті, зятьяс, эстшӧм звер вермид кутны. Седуныд пӧ кытчикӧ мунліс жӧ, энӧ пӧ аддзылӧ? Эгӧ пӧ, шувӧны зятьяс, и мӧда-мӧд вежмӧн ошйысьӧны сар водзын, кыдзи найӧ куталісны зарни ланьӧс.

Коркӧ-й дыр мысти Седун локтӧ. Шорӧдзыд нин ветлӧма да бӧрсӧ локныд дыр лови. Сія, зонмӧ, вӧв яй вывсьыд куталӧма катша-ракаясӧс, гашкӧ, дасӧс вайӧ, кыскӧ:

— На,— шувӧ,— тесьт-тьӧща, гӧстинеч вайи.

Серамыд сэні!

— Тьпу,— шувас сар,— дворечсӧ менсьым пезйалан, мунӧ,— шувӧ слугаяслы,— кытчикӧ шыбитӧ ӧдйӧджык йӧз водзсьыс.

Седун бара баба дінӧ тімбыльтӧ-мунӧ, пызан дорӧ весиг эз корны.

Сэсся-й ӧпеть ме пыри да висьталі, эстӧн, эстӧн, меся, эм зарни тшӧтя порсь. Сар и шувӧ зятьяслы. Но, пӧ, зятьяс, эстӧн, эстӧн пӧ кывсьӧ зарни тшӧтя порсь. Сія кӧ пӧ вермад вайны меным, вот пӧ и бур зятьяс лованныд, нэм пӧ ог вунӧд.

Ладнӧ пӧ, шувӧны зятьяс, ветлам. Кокъясыд эськӧ висьӧны да, бур зятьясӧн лоны ещӧ окота. Босьтісны сюмыс вӧжжи ли мый ли и мунісны.

А Седун бабасӧ ӧпеть ыстӧ:

— Мун, Марпида Саревна, ветлы да корлы меным мӧд кӧбыласӧ, ме тшӧтш ветла зарни тшӧтя порсьыдла, ме вӧд сар зять жӧ.

Марпида Саревна муніс батьлысь корны вӧв, а бать шувӧ, ог пӧ сет, ӧтиӧс пӧ сетлі нин да страмитіс став йӧз водзас. Саритса ӧпеть ныв дор сувтіс, жальыс петіс, мый нӧ пӧ жалитан ва кыскалан кӧбылатӧ, сет пӧ вай. Но, сар сэсся сетіс жӧ, венісны кыкнад.

Седун пуксис кӧбыла вылӧ бокала и ӧпеть мунӧ, восьлӧн и мунӧ. Видзӧд, видзӧд пӧ, горзӧны да сералӧны пируйтысьяс, Седуныд пӧ ӧпеть мӧдӧма, а ӧні пӧ лӧсьыдджыка нин пукалӧ, велалыштӧма. Тая пӧ бара кутас нин порсьтӧ. А Седун найӧ пыдди оз пукты, мунӧ и мунӧ. Шорӧ вовис, а кӧбылас кватитіс бӧжӧдыс да тракнитіс, яйыс ылӧ туті, а кучиксӧ потшис вылӧ ӧшӧдіс. Сэсся чукӧстіс ассьыс мӧд вӧвсӧ, ӧти пеляс пырис, пывсис, мыссис, мӧдас кӧмасис, пасьтасис, ӧпеть зэв ён да мича молодеч лови. Сейчас сійӧ свӧякъясӧс сувӧдіс да швачӧдіс-кучкаліс пель бокас. Ная толькӧ шувалӧны, свят, свят пӧ, ӧпеть пӧ Илля великӧйыд страститӧ миянӧс.

А Седун ветліс и кутіс зарни тшӧтя порсьӧс.

Бӧр локтігӧн паныдасисны свӧякъяс.

— Тэ тай нӧ ваян нин, молодечӧ, ми мунам кутны-а? Он-ӧ тэ вузов миянлы?— ювалӧны сылысь.

Вузала пӧ, шувӧ молодеч. А мый нӧ пӧ коран порсьыд вылӧ. А кора пӧ ме мышкусьыныд тасма пасьта кучик кульыштны... Думайтісны, думайтісны свӧякъяс и ӧпеть сӧгласитчисны, кульыштісны мӧда-мӧдыслысь тасма пасьта кучик и сетісны молодечлы. А молодеч налы колис зарни тшӧтя порсь и муніс.

Вайӧдісны свӧякъяс зарни тшӧтя порсьӧс сар ордӧ, сарлы ещӧ любӧ лови, ещӧ ёна кутіс пируйтӧдны, гӧститӧдны.

Коркӧ-й дыр мысти Седун локтӧ. Сыысь уна вайӧма катша-ракатӧ, куим сы мында, гашкӧ, куталӧма вӧв шуй вывсьыд. Ӧпеть пӧ Седуныд страмитӧ менӧ, шувӧ сар. Но, ӧні Седунӧс эз нин лэдзны матыстчывны пируйтысьяс дорӧ. Тесьт-тьӧщалы гӧстинеч и быдтор эськӧ вайӧма да, эз лэдзны морттӧ, тімбыльтіс сэсся гортас, ичмонь дінас.

А ме ӧпеть висьталі сарыдлы, эстӧн, эстӧн, меся, эм комын сывъя кӧбыла и сылӧн комын чань. Сар и ӧпеть шувӧ, но пӧ, зятьяс, бур зятьяс, эстӧн, эстӧн пӧ кывсьӧ, комын сывъя кӧбыла и сылӧн пӧ эм комын чань. Вермад кӧ пӧ кутны сійӧ да ваяд меным, медбур зятьяс пӧ лованныд, нэм пӧ кута любитны и буравны.

Ладнӧ пӧ, шувӧны зятьяс, ветлам пӧ, асьныс эськӧ ветлыныс нин оз вермыны, а век бурӧ кӧсйӧны пуксьыны. Босьтісны мыйяскӧ сьӧраныс и мунісны.

Седун ӧпеть ыстӧ бабас, мун пӧ ветлы да кор коймӧд кӧбыласӧ, ме пӧ вӧд зять жӧ, ветла тшӧтш свӧякъяскӧд.

Марпида Саревна муніс бать дінӧ. Сія эськӧ оз вӧлі сет да ӧпеть саритса нылыс дор сувтіс, тшӧктіс сетны кӧбылас.

Седун пуксис да ӧні прамӧя нин мунӧ, пукалӧ лючки и рӧдйӧн гӧнитӧ. Со, пӧ, другӧ, велалі ветлыныд, шувӧны йӧзыс, сералӧны да. Но, Седун вовис шорӧ, кӧбылас босьтіс бӧжӧд, тракнитіс,и яй туті, кучик ӧпеть ӧшӧдіс потшис вылӧ. Сэсся чукӧстіс коймӧд вӧвсӧ, воронкосӧ. Вӧв вовис, да ӧти пеляс пывсис, мыссис, мӧдас кӧмасис, пасьтасис, сэтшӧм молодеч лови, мича да ён.

Вӧлыд сылы и шувас, босьт пӧ, кӧзяин, куим ведра сир да куим пож ем, и потшис вывсьыд вӧв куястӧ босьт. Ми пӧ мунам сэсся комын сывъя кӧбылас кутны, сія пӧ йирсьӧ чаньяскӧд поле вылын. А поле вылас эм дуб. Тэ пӧ кай сэтчи, а кайтӧдзыд ме вылӧ пукты вӧв кутӧ и кисьт пӧ ведра сир и пож ем, сэсся пӧ мӧдсӧ дай коймӧдсӧ сідз вӧч. Но, сэсся пӧ, кӧбылад локтас да, виччысь толькӧ, кор пидзӧс вылас усяс. Сэки пӧ чеччышт и домав, кӧбыла и чаньяс пӧ ловасны тэнад, оз нин пышйы сэсся.

Иван босьталіс, мый тшӧктіс вӧлыд, и мӧдӧдчис мунны. Свӧякъястӧ, дерт, джын туяс и сувӧдіс на, ӧпеть швачӧдліс-кучкаліс пель боканыс. Свят, свят пӧ, ная шувалӧны, Илля великӧйыд пӧ бара страститӧ миянӧс. А Иван сія лэбыштіс и водзӧ муніс. Муніс, муніс, вовис поле и поле шӧрын дуб. Вовис дуб дорад, видзӧдӧ, кӧбыла йирсьӧ поле вылын. Аслас вӧв вылӧ ӧти кӧбыла кутӧ шлапкис, кисьтіс ведра сир да вылысас пож ем, сэсся мӧдӧс шлапкис, бара ведра сир да пож ем, и коймӧдӧс сідз лӧсьӧдіс. Ачыс сэсся дуб йылас кайис да сулалӧ, виччысьӧ. А кӧбылад аддзис сылысь воронӧй вӧвтӧ, уськӧдчис, зонмӧ, да кыдзи тай курччас! Не кӧ кӧбыла кучикыд, сирыд да, емыд да, Воронколы эськӧ сэні и смерт, виис эськӧ. Да, ладнӧ, вӧв куыд веськалі. Воронко чужъялӧ, жваньгӧ бокас, а комын сывъя кӧбылалӧн, вомыс тыри сирӧн, емӧн да, оз вермы курччыны водзӧ, мынтӧдчӧ. Кыдзкӧ вӧд и мынтӧдчис сэсся. И мӧдысь курччис-апыштіс, мӧд ку веськалі, сирнас и емнас. Мынтӧдчис, мынтӧдчис и ӧпеть кыдзкӧ мыні. Коймӧдысь апыштіс да коймӧд пож ем шеді. А Седунлӧн Воронко ӧтарӧ жваньгӧ-чужъялӧ. Чужъяліс, чужъяліс, кӧбыла сэсся-й уси пидзӧс вылас. А Иван чеччыштіс дуб вывсяньыд дай домаліс, ӧні пӧ он пышйы меысь. А мам кӧ оз пышйы и чаньяс оз пышйыны, дерт, ная, тӧдӧмысь, вӧтчасны.

Мӧдӧдчис мунны, а паныд ловины свӧякъяс. Тэ пӧ тай нӧ, молодеч, кутӧмыд нин тая, ми пӧ мунам кутны-а. Менам пӧ кутӧма нин, шувӧ Иван. А тэ пӧ он вузов миянлы. А мый вылӧ пӧ ньӧбанныд, пондіс шуны Иван. Свӧякъяс сійӧ оз тӧдны, думыштныс оз кужны, а Иван, дерт, тӧдӧ. Кок чуньясыд пӧ абу, мыш кучикныд абу, мый вылӧ пӧ и вузала тіянлы. Юртӧ пӧ тіянлысь он босьт, буракӧ, юртӧгыд пӧ он воӧ гортад, а деньга вылӧ, шувас, ме ог вузов.

Зятьяс сэтчӧ колины сулалан, а Иван муніс сар дорӧ.

Ылісянь и аддзисны локтӧмтӧ, сылӧн вӧд, сӧ, дзонь табун лови. Комын ӧти чаня-вӧла да комын кыкӧд аслас вӧлыс. Бусыс кымӧрӧн кайӧ, локтӧ да. Казялісны, быдлась петісны йӧзъяс, восьталӧны конюшняяс, мед отсавны зятьяслы йӧртны. Ная вӧд оз думайтны и некод оз думайт, тая пӧ Седун кутӧма да вайӧ. Сар шувӧ, ланьтӧ пӧ кутісны, порсьтӧ кутісны, со пӧ и комын сывъя кӧбылас кутӧмась менам зятьяс. А Седунӧс оз казьтыв, оз и зять туйӧ пукты вӧд. Сія пӧ ваяс на коркӧ катша-ракатӧ, сералӧны пируйтысьяс. Но, петісны ставыс стречайтны, сувталісны конюшняяс дорӧ. Тшӧтш и Марпида Саревна петіс, восьтіс ассьыс карта ӧдзӧссӧ. Пу дзиръя сылӧн вӧлі карта ӧдзӧсыс да зэв ёна дзуртӧ. Мый пӧ бара седуникас сэн кимӧсьтитчӧ-а, сералӧ сар, виччысьӧ жӧ пӧ, тыдалӧ, кодӧскӧ. А вӧвъяс локтісны, локтісны и гузь пырисны Седун карта(ӧ). Йӧз дивуйтчӧны да шензьӧны, мый нӧ пӧ тая. Седуныд пӧ али мый кутӧма комын сывъя кӧбылатӧ. Молодечтӧ эськӧ аддзылісны да некод эз чайт сійӧ Седунӧн, тая пӧ тӧдтӧм морт кодкӧ. А сія пырис гортас да шувӧ Марпида Саревналы:

— Но, мун жӧ, баба, пывсян ломты, дыр нин ветлі да няйтӧсси.

Пывсян ломтісны, сія лэччис пывсьыны. Мун пӧ батьтӧ ысты, шувӧ

Марпида Саревналы. Бать дінӧ муніс Марпида Саревна, Седуныд пӧ корис пывсьыны, шувӧ батьлы. Седункӧд пӧ пывсьыны ог жӧ мун, шувӧ сія, тырмас пӧ, страмитіс нин менӧ. А Седун лэччис пывсянӧ, порог весьтӧ ӧшӧдіс свӧякъяслысь кок чуньяссӧ да мышку кучикъяссӧ и пырис пывсьыны. Сар пукаліс, пукаліс, а час пӧ лэччыла, ог-ӧ вермы пӧ кыдзкӧ-мыйкӧ ылӧдны сылысь комын сывъя кӧбыласӧ, ачыс пӧ вӧд эз жӧ кут-а. Лэччис, пывсянӧ пондіс пырны, трон инмис плешкас кок чуньыд, шляп кучкис мышку кучикыд.

— Тайӧ нӧ мый вӧчӧмыд, ӧшлӧмыд?— ювалӧ сар.

А этъя пӧ зарни сюра лань, индіс Иван кок чуньяс вылӧ, а этъя пӧ зарни тшӧтя порсь, шляп-шляп керыштіс воча мышку кучикъясӧн... Тая и тая пӧ вот тэнад зятьяслӧн.

Сар кайис зэв ӧдйӧ, зятьяс муртса на вовӧмась. Нолтӧ пӧ вай пӧрч-чылӧ кокъястӧ, петкӧдлӧ кок чуньястӧ, тшӧктӧ сар. Мыйла нӧ пӧ. А вайӧ пӧ, вайӧ, пӧрччылӧй. Зятьяс пӧрччисны сапӧгъяссӧ, а ыджыд кок чуньыс некодыслӧн абу, вундӧма. Вайӧ пӧ и паськӧмтӧ пӧрччылӧй, тшӧктӧ сар. Дӧрӧм и гач пӧрччӧдіс зятьяслысь.

А сэні йӧзыд! Серамыд! Ставыс сералӧны, виччысьӧны вӧд, со, кӧбыла вайӧмтӧ, унаӧнӧсь. Сэні и пируйтысьяс, слугаяс и, прӧстӧй крестьяна и. Куснясьӧмӧн сералӧны, видзӧдӧны да. А зятьяс юр ӧшӧдӧмӧн сулалӧны, яндзим. Тіянлы пӧ и кукнясӧ ме ог сет, шувӧ сар, убирайтчӧ пӧ мӧд сарство(ӧ). Сэсся вӧтліс найӧс гӧтыръяснас и быдсӧн, мед пӧ дукыс эз вӧвны менам сарствон. А ачыс лэччис пывсянӧ. Но, Иванлӧн пывсьыссьӧма нин. Сія, дерт, абу седун, пывсьӧма, мыссьӧма да сэтшӧм молодеч ловӧма, ок, кутшӧм мича да ён! Кайисны саркӧд и сизим сы мында и ещӧ бура пируйтісны, столуйтісны гӧстьяскӧд.

Сэсся Иванӧс сарӧ пуктісны. Иван сар лови, а ачыс, важ сарыс, петіс бывшейӧ, старикӧ кольччис. Марпида Саревналы вӧлись оландыр вовис, нимкодь, лӧсьыд. Вот сэсся, колӧкӧ, и ӧні на сарствуйтӧ Иван, олӧ-вылӧ зэв лӧсьыда Марпида Саревнакӧд.

Коми Мойдъяс

*   *   *

Реклама Google: