Komi Zyrians Traditional Culture

КОМИ КУЛЬТУРА ГРАММАТИКА СЛОВАРИ ЛИТЕРАТУРА МУЗЫКА ТЕАТР ЭТНОГРАФИЯ ФОТОАРХИВ КНИГИ

Висер вожса сьыланкывъяс да мойдкывъяс. Лӧсьӧдіс И.А.Осипов, 1986. Серпасъяс: Аркадий Мошев.

КӦИН САР · Коми Мойд

В
В

 ажӧн оллӧма-выллӧма Кӧин сар. Но, Кӧин сар оліс-выліс и быд керкась дорвыв сёйис ныла-зонма быд лун. Нёль кӧ, кыкӧс сёйӧ, кыкӧс кольӧ, а кык кӧ, кыкнансӧ сёйӧ, нинӧм оз коль. Коркӧ-й пондіс воны поп ордӧ. А поплӧн сӧмын кык челядь ий эм: Ӧльӧксея-Божъя да Ӧдӧття Поповна. Поп гозъя и кутісны шуны:

— Асланым синмӧн видзӧдны ӧгӧ жӧ сетӧ челядъӧс сёйны. Вай жӧ ті пышйӧй,— шувӧны поп гозъя челядьлы.

Попаддя шувӧ, сет пӧ налы шӧвк шуринка да мед мунасны регыдджык. Но, поп сетіс шӧвк шуринка, деньгатор сетіс, дерт, и чоя-вока петісны, кутісны пышйыны. Сучко да Белько ещӧ налӧн вӧлі да, босьтісны сьӧраныс, понъяснад гажаджык.

Мунісны, мунісны, регыд, дерт, висьтовны, а мунны дыр тырмӧ, и вовисны ю бердӧ. Шӧвк шуринка найӧ шыбытісны, вуджисны ю вомӧн. Муртса на вовисны мӧдарас, кыскыштісны шӧвк шуринкатӧ, сейчас сэтчӧ Кӧин сар и вовис.

— Ак,— шувас,— удитінныд кыскыштны, кужинныд. Эн кӧ эськӧ удитӧ, ме сёйи тіянӧс.

Но, ладнӧ. Ӧні найӧс он нин босьт. Ная мӧдарас вуджисны и керка вӧчисны пелькиник, будка сэтшӧм, и пондісны сэн овны. Чой горт олӧ, а Ӧльӧксей ветлӧ, вӧралӧ, Сучко-Белькокӧд кыйӧ пӧткаяс да зверьяс.

Ӧтчыд Ӧдӧття Поповна лэччис вадорӧ и аддзис — зэв мича молодеч ветлӧдлӧ, пӧкаживайтӧ берег пӧлӧн. Ӧдӧття Поповна пӧ, чукӧстіс, вуджӧд пӧ менӧ. Менам пӧ шӧвк шуринкай абу, Ӧльӧксей вӧдитӧ. А тэ пӧ кор сылысь да аски инӧ вуджӧд, шувӧ молодеч. Ладнӧ пӧ, ӧтвет видзӧ Ӧдӧття Поповна.

Ӧльӧксей вовис рытыв, узис. Аски мӧдӧдчис ӧпеть вӧровны. Чой и шувӧ:

— Тэ нӧ мый шӧвк шуринкатӧ сьӧрсьыд новлӧдлан, юяс али мый вуджавлан?

Ог пӧ эськӧ да, сьӧрын тай ветлӧ-а, шувӧ Ӧльӧксей. А он кӧ пӧ вуджавлы, вай коль гортӧ. Коля пӧ, шувӧ Ӧльӧксей, сэсся и сетіс шӧвк шуринкатӧ чойлы.

Чой лэччис вадорӧ, бурлак ӧпеть ветлӧдлӧ. Ӧдӧття Поповна пӧ, вуджӧд нин, чукӧстіс молодеч. Вуджӧда пӧ, шувӧ ныв, сэсся-й шыбытіс шуринкатӧ. Но, молодеч сейчас пондіс вуджны, мыйӧн вовис сыладорас, Кӧин лови. Ӧні пӧ кытчи пышъян, уськӧдчис ныв вылӧ. Некытчӧ пӧ ог, шувӧ ныв. Том молодеч сылы кажитчӧма нин вӧлі, кытчӧ пышъяс. Но, ладнӧ пӧ, шувӧ Кӧин сар, кутан овны сідзкӧ мекӧд баба пыдди. Ная сэн, кӧнешнӧ, знакомитчисны-керисны и пондісны овны гозъя моз. Рыт воны кутіс. Кӧин сар и висьталӧ бабаслы, тэнад вокыд пӧ регыд вовас, тэ пӧ сылы эн висьтав нинӧм, а лэдзчысь пӧ висьӧмӧ да тшӧкты вокыдлы, мед понъяссӧ оз йӧрт керка(ӧ), найӧ пӧ менӧ косявласны, пырасны кӧ. Сэсся пӧ тэ ысты воктӧ лекарствола, эстӧн, эстӧн пӧ эм мельнича, дас кык изки изӧ. Мед пӧ сія ветлас и медпыді ларсьыс мед ваяс пызьсӧ, сійӧн пӧ тэ и справитчан быттьӧ, сёян да.



Но, ладнӧ, рыт вовис, коркӧ-й, кылӧ, Ӧльӧксей локтӧ вӧраланінысь. Ӧльӧксей пӧ, шувӧ Ӧдӧття Поповна, эн лэдз понъястӧ, ме пӧ вися да, гашкӧ, лӧгасяс понъяссьыд висьӧмыс. А понъяс, ой, ой, толькӧ и чеччалӧны, сайдтӧг пырӧны. Ная кылӧмась нин Кӧин сар дуктӧ. А Ӧльӧксей нинӧм оз тӧд, вӧтлаліс понъясӧс и пырис.

Аски Ӧльӧксей чеччис, сёйыштіс и бара мӧдӧдчис вӧровны. Чой и шувӧ: ме пӧ вот, Ӧльӧксей, вӧт аддзылі, эстӧн, эстӧн пӧ, сія сторонаын эм мельнича, дас кык изки изӧ. Тэ кӧ пӧ вот, эськӧ, ветлан сэтчи, ваян меным медпыді ларсьыс пызьсӧ, ме пӧ и справитча, сёя сійӧ пызьсӧ да. Ветла пӧ, шувӧ Ӧльӧксей. Чой висьмӧма да кыдз он ветлы, дерт, ветлас.

Но, сія петіс, босьтіс Сучко-Белькоӧс и мӧдіс мунны. Муніс, муніс, дерт, мен регыд висьтоны, а мунны тырмис дыр. Вовис мельнича, збыль дас кык изки изӧ и дас кык лар. Сія пырис мельнича(ӧ), медпыді ларсьыс босьтіс китыр пызь и бӧр кутіс петны. Кутшӧм ӧдзӧс петӧ, сія-й игнассьӧ, кутшӧмӧс петӧ, сія-й игнассьӧ. А ӧдзӧсъяс зэв ёнӧсь; ставыс кӧртысь. Петіс ылла(ӧ), кватитчис, а Сучко-Белько абуӧсь, медпыдіас игнассьӧмась. Ок, сӧтана пӧ, сӧткыштіс зэв чорыда. Вуджӧдіс пӧ тай, буракӧ, менам чойыд Кӧин сартӧ, ылӧдлӧма пӧ тай сійӧс Кӧиныд. Сія кӧ пӧ эз велӧд, некыдз пӧ тайӧ эз вермы лоны. Но мый сэсся керан: шӧвк шуринка коли гортӧ, чой ордын, Сучко-Белько игнассисны ӧкмыс ӧдзӧс сайӧ, восьтыны ни жугӧдны он вермы. Ӧні Кӧин сар, дерт нин, сёяс; аддзас кӧть кытысь.

Бӧр бергӧдчис гортӧ. Гортӧ локны пондіс, Кӧин и паныд уськӧдчис. Ӧні пӧ кытчи воштысян, шувӧ сія. Но, ӧні пӧ вот и сёя; сёйны и лӧсьӧдчӧ Ӧльӧксейӧс. Но, сёй пӧ, шувӧ Ӧльӧксей, пышйыны пӧ ме тэысь ог вермы, сёй пӧ, кужин кӧ ылӧдлыны чойӧс. А чой сэн жӧ, сія петіс кильчӧ вылӧ, самӧй Кӧин лӧсьӧдчӧ сёйны, сія и шуны кутіс Кӧиныслы. Тэ пӧ, шувӧ, ӧні эн на сёй сійӧс, а тшӧкты пӧ пывсян вӧчны да мед пывсяс, мыссяс первой. Ӧні пӧ дука сылӧн яйыс, вӧр керкаын тшынъяс пиын оліс да. Со жӧ вӧд кутшӧм сія Поповнад. Аслыс пӧльза вылӧ ещӧ на пывсян тшӧктіс стрӧитны.

Кӧин сар кӧ сёяс стразу, пывсян оз ло, а сія пӧ мед кувтӧдзыс пывсян на вӧчас миянлы пывсьыны.

Но, ладнӧ, Кӧин сар кывзіс бабалысь, сідз пӧ и эм, шувӧ, и тшӧктіс вӧчны пывсян. Но, Ӧльӧксей кутчысис вӧчны, ваяліс керъяс, тшупис, лэптіс, ??ЫВСЯН лови гӧтов, сӧмын ломтыны коли. Друг кырныш локтӧ, лэбзьӧ, кур, кур пӧ, Ӧльӧксея-Божъя, Сучко-Белькод пӧ куим ӧдзӧс нин петісны, квайт ӧдзӧс пӧ коли. Лэччыв пӧ вадорӧ да чукӧрт валежник, сійӧн пӧ и ломты пывсянтӧ, мед дырджык ломтысяс. Ӧльӧксей кывзіс кырнышлысь, вадорысь валежник катліс, ломтіс. Трубаысь кутіс пуритны-петны сьӧд тшын, сӧмын тшын и эм, а жарыс абу

Кӧин и шувӧ:

— 0, тшын нин петӧ, регыд, сідзкӧ, Ӧльӧксей пывсяс, позяс сёйыштны.

Мыйкӧдыра мысти ӧпеть кырныш лэбзьӧ, кур, кур пӧ, Ӧльӧксея-Божъя, Сучко-Белькод пӧ квайт ӧдзӧс нин петісны, куим нин сӧмын коли. Тэ пӧ ветлы вӧрӧ да сир чаг вӧлол, сійӧн пӧ и ломты, мед пӧ жар ловӧ, ставыс пӧ мед калитчас. Ӧльӧксей ветліс вӧрӧ, вӧлаліс сир чаг, ломтіс сир чагйӧн.

Мыйкӧдыра кад коли, кырныш ӧпеть лэбзьӧ. Кур, кур пӧ, Ӧльӧксея-Божъя, Сучко-Белькод пӧ регыд нин петасны, ӧдзӧсӧн-джынйӧн пӧ толькӧ коли, дас кык гӧлик пӧ вӧч. Но, ладнӧ, Ӧльӧксей гӧликъяс вӧчаліс, бара кад коли. Пывсян гор сир чагнад доналӧма нин. Друг видзӧдӧ да, Сучко-Белько локтӧны, пызйӧны, кывсӧ ӧшӦдӧмась, сэтшӧма тэрмасьӧны. Локтісны и сейчас пывсян джодж улӧ пырисны.

Коркӧ-й Кӧин видзӧдліс да, пывсянысь тшын омӧля нин петӧ. Но, пывсяныд пӧ тай ваймӧма, ловӧ пӧ ветлыны да сёйны Ӧльӧксейӧс. Пывсян кӧджас пырис да, лок нин пӧ, шувӧ Ӧльӧксейлы, тэнад пӧ пывсьыссис, позьӧ нин сёйны. Няньыс пӧ вӧд оз волы шыр дорӧ, а шырыс волӧ нянь дорӧ, шувӧ Ӧльӧксей, пыр пӧ ачыд татчӧ. О, пӧ, кутшӧм повтӧм тэ ачыд вӧлӧмыд, шувӧ Кӧин, мыйкӧ пӧ шувалан ещӧ, загадкаясӧн сёрнитан. Час пӧ ме тэныд пырала. Кӧин юр мыччис, пывсянӧ заводитіс пырны, Сучко-Белько тай кыдз уськӧдчасны! Кватитісны кык пель вужйӧдыс да кутісны пурны, таскайтісны сир чаг пиас. Ставсӧ пурисны, курччалісны, Кӧин жуялі нин. Ӧльӧксей сія сэн чепӧсйис да, биӧн чуткис сир чагъяд. Ой, ой, толькӧ кутіс валяйтны-сотчыны. Сучко-Белько да Ӧльӧксей ӧдйӧджык петісны пывсянысь, босьтісны гӧликъяс, а бисьыс помтӧг кутісны петны кодзувкотъяс. Сія эськӧ абу кодзувкот, а сія Кӧин сарыд петӧ, кодзувкотӧн кӧсйӧ петны. Но, ная сэн толькӧ и сявкйӧны-чышкӧны, ставсӧ бӧр биас шыблалісны. Сэтчи тшӧтш чойсӧ корис, лок пӧ чышкы, тшӧктіс чышкыны. Ставсӧ чышкисны, ӧтиӧс эз лэдзны.

Пывсян ваймис, би кусі. Но, сэсся пӧ и мынім таысь, шувӧ Ӧльӧксей. Кӧин сарлы пӧ пом. Но, сэсся пӧ ме ветла ӧні гуляйтны и кӧть кор да, вола пӧ тэла, шувӧ чойыслы. Ӧтнадтӧ пӧ татчӧ ог коль, петкӧда вӧлӧсь-тӧ. А ӧні ме вӧча тэныд кык пельса. Видзӧдлам пӧ, коді тэныд жальджык, Кӧин али ме. Сэсся сійӧ вӧчис кык пельса, ӧти вылас гижис "Кӧинлӧн", мӧд вылас "Ӧльӧксея-Божъялӧн", и муніс гортсьыс. Босьтіс эз Сучко-Белькоӧс, вот сійӧ ог куж висьтовны, мукӧддырйиыс тай, со, пыр босьтліс-а, ӧнісӧ ог тӧд, сьӧрас абу.

Муніс, муніс, коркӧ-й вовис мӧд сарство(ӧ). Сэні йӧзыс ставыс шызьӧма, ставыс кок йылӧ сувтӧма. Ӧльӧксей кутіс юасьны, мый кузя пӧ йӧзыс тадзсӧ шызьӧма. Сылы и висьталісны, выль сарӧс кӧсйӧны пуктыны. Кор тыр чукӧртчӧма йӧз, сэні и озыр, и гӧль, и быдсяма эм, став сарствось чукӧртӧмась, быдӧнлы киас сетӧмась сись. Вичко гӧгӧр кытшовтасны и вовасны вӧлтар весьтӧ, кодлӧн сиськыд ӧзъяс, сія и ло-вӧ сар.

Ӧльӧксей, дерт, сэн жӧ, да сылы тшӧтш сетісны сись. Йӧз чукӧркӧд сійӧ тшӧтш кытшовтіс и вовис вӧлтар весьтӧ, шпут ӧзйис Ӧльӧксея-Божъялӧн сиськыд. А бокас сылӧн гӧгӧр лӧсялісны озыръяс. Налы завидь, аслыныс окота пуксьыны сарӧ да. Ная давай и кусӧдны сылысь сисьтӧ. Ӧльӧксейлӧн паськӧм киссьӧма, омӧлик, вӧраланінысь локтӧ. Гашкӧ пӧ, тая и корысь да, думайтӧны ная, тая пӧ абу сарпу. Кусӧдісны сылысь битӧ. йӧзыс, эськӧ, горӧдлісны жӧ, со пӧ, со, ӧзйис пӧ кодлӧнкӧ. Да кусӧдӧм бӧрад кысь нин аддзан, кӧні пӧ вӧлі, кодлӧн. Давай пӧ мӧд-пӧв кытшовтӧ, мыйла пӧ кусӧдінныд, шуны кутісны йӧзыс.

Ӧпеть кытшовтісны. Мыйӧн вовисны вӧлтар весьтӧ, Ӧльӧксея-Божъялӧн сиськыд ӧпеть бара шпут ӧзйис. Со пӧ, со, горзӧны йӧзыс, ӧзйис пӧ, со, кодлӧнкӧ. Но, озыръяслы завидь да ӧпеть кусӧдісны битӧ, бара эз аддзыны, кодлӧн ӧзйыліс.

Но, давай коймӧдысь. Сэсся пӧ коді кусӧдас, сійӧс веськыда пуксьӧдны тюрма(ӧ), шувисны гырысьяс. Кытшовтісны коймӧдысь, и дерт, бара Ӧльӧксея-Божъялӧн ӧзйис. Ӧні сэсся эз кусӧд некод, эз лысьтны. Ӧльӧксейӧс петкӧдісны йӧз пӧвстысь, сія-й шувӧ, куимнанысьсӧ пӧ эськӧ менам ӧзйыліс да эг пӧ лысьт висьтовнысӧ, полі пӧ виӧмысь.

Но, Ӧльӧксея-Божъя сэсся лови сар. А важ сарлӧн вӧлі ныв, Марпида Саревна, зэв мича: яй пырыс лыыс тыдалӧ, лы пырыс вемыс тыдалӧ. Сія Ӧльӧксейлы зэв ёна вовис сьӧлӧм вылас и видзӧ нин гӧтырпу пыдди, гӧтрасьны кӧсйӧ. Но, ладнӧ. А гӧтрасьтӧдз пӧ, шувӧ Ӧльӧксей, ме ветла чойла, вая пӧ пир вылӧ.

Муніс сія, вовнс гортас и аддзӧ: Кӧинлӧн пельсаыс чукйӧн тыр синван, а Ӧльӧксейлӧн киссьӧма. Ок пӧ, понйӧй, понйӧй, а нува жӧ пӧ нин пон места(ӧ), шувӧ Ӧльӧксей. Сэсся сія босьтіс чойсӧ и муніс бӧр аслас сарство(ӧ).

Вовис, кораліс Марпида Саревнас, мӧдісны свадьбуйтны, пируйтны-столуйтны. Пир-бал сэн вӧлі бур, ставыс, дерт, тырмис сёйны и юны. Пир бӧрын сэсся мунісны, водісны. А чойыд сылӧн, Поповнад, кӧнкӧ сэн жӧ вӧлӧма, сійӧ спальняс. Пӧим письыд сія босьтлӧма Кӧин пиньтӧ, Ӧльӧксейлы морӧс вылас пуктас, и кулӧ сія. Некод нинӧм оз и тӧдлы. Выль сар пӧ кулӧма, выль сар кулӧма, шызясны аскинас став йӧзыс. Но, кулӧма, кулӧма ий эм. Колӧ дзебны. Выль сарӧс нин бӧрйыны думайтӧны. Марпида Саревна пукалӧ ӧшинь дорас да зэв ёна бӧрдӧ, шогсьӧ мужик понда. Вовисны кыськӧ Сучко да Белько. Мыйла нӧ пӧ бӧрдан, Марпида Саревна. А кыдз нӧ пӧ он бӧрд, мужикӧй пӧ кулі да. Ӧні на пӧ верӧс сайӧ муні, выль сар сайӧ, а сія пӧ первой войнас и кулі. А кытчӧ нӧ пӧ дзебид, ювалӧны Сучко да Белько. Сэтчи пӧ, индіс, висьталіс Марпида Саревна.

Сучко-Белько котӧртісны гу дорӧ, пондісны зэв ӧдйӧ парсавны лапаяснас. Регыдӧн и кодйисны, аддзисны, Ӧльӧксея-Божъя куйлӧ гортйын кулӧма. Ная тӧдӧны нин вӧлӧм да, шурк-шарк разисны морӧссӧ, аддзисны Кӧин пинь. Нинӧм сэсся эз коль Кӧин пиньсьыд, ставсӧ курччалісны, дрӧбитісны пызьӧдз. Ная сэсся томла-ловва вайисны и зыралісны сійӧн Ӧльӧксейӧс. Ӧльӧксей пондіс вӧрӧшитчыны, сэсся-й восьтіс синсӧ.

— Уф,— шувас,— дыр жӧ пӧ узьсьӧма.

— Не Сучко-Белькоыд кӧ, нэмтӧ узин,— шувӧны понъяс.

Но, ладнӧ. Ӧльӧксей чеччис, муніс гортас. Марпида Саревна зэв рад лови, мужик ловзьӧма да. Аскинас став карыс и став сарствос шызис.

Выль сар ловзьӧма, выль сар ловзьӧма! Вот тая чудеса,— дивуйтчӧны йӧз.

А сар гозъялӧн дед эм, пӧрысь дед. Ӧльӧксейлӧн чойыд петас дай удтас. Сія пӧ, выль зятьыд тэнад, ошйысьӧ ӧти войӧн куим вожа канава кодйыны. Ӧтиӧд пӧ визывтӧ пӧжӧм йӧв, мӧдӧд — уль ма, коймӧдӧд — вина. Дед ий корас Ӧльӧксейӧс. Тэнад пӧ тай зэв ыджыд морттуйяс вӧлӧма, шувӧ сылы, тэ пӧ ошйысян ӧти войӧн кодйыны куим вожа канава: ӧтиӧд визывтӧ пӧжӧм йӧв, мӧдӧд — уль ма, коймӧдӧд — вина. Мед пӧ вӧлі вӧчӧма аски кежлӧ сэтшӧмсӧ.

Но, ладнӧ. Ӧльӧксей локтіс гортӧ. Зэв кручиньӧн-печальӧн пукалӧ. Марпида Саревна и ювалӧ, мый нӧ пӧ сідз шогсян-пукалан. А кыдз нӧ пӧ ог шогсьы, вот ӧти войӧн пӧ дедыд тшӧктіс кодйыны куим вожа канава и мед пӧ ӧти вожӧд визывтӧ пӧжӧм йӧв, мӧдӧд — уль ма, коймӧдӧд — вина. Абу кӧ пӧ важ шогын, эн шогсьы, шувас сылы Марпида Саревна, вод пӧ да узь. Рыт вовас, Марпида Саревна чукӧстас ассьыс эньки-мамкиӧс, и сылӧн ӧти войӧн ставыс ловӧ гӧтов.

Аскинас чеччисны йӧз, видзӧдӧны, зэв ыджыд куим вожа канава артмӧма. Ӧти вожӧд визывтӧ пӧжӧм йӧв, мӧдӧд — уль ма, коймӧдӧд —вина. Чой и шувӧ, аттӧ пӧ дивӧ, эг пӧ вермы йӧртны, збыль вӧчӧма. Сэсся сія мӧд рытын мунас да ӧпеть удтас. Выль зятьыд пӧ, шувӧ, ошйысьӧ ӧти войӧн куим суда каменнӧй вичко вӧчны, попӧн и дякӧн, и звӧнӧн.

Дед и корис зятьӧс:

— Но тэ, выль зять, ошйысян да вывтісӧ эн ошйысь. А мед водзӧ вылӧ велалан и он кут ошйысьны, вот тэныд удж; аски кежлӧ мед вӧлі вӧчӧма куим суда каменнӧй вичко, и мед вӧлі сэні поп и, дяк и, звӧн и, сьылӧны мед.

Ӧльӧксей вовис гортӧ, зэв кручиньӧн-печальӧн пукалӧ. Марпида Саревна и ювалӧ, мыйысь нӧ пӧ сідз шогсян, Ӧльӧксей. А кыдз нӧ пӧ он шогсьы, вот ӧти войӧн пӧ дедыд тшӧктіс вӧчны куим суда каменнӧй вичко, и мед пӧ вӧлі поп и дяк, и сьылӧны пӧ мед. Абу кӧ пӧ важ шогын, эн шогсьы, шувас сылы Марпида Саревна, вод пӧ да узь.

Но, ладнӧ. Ӧльӧксей мунас, водас. Рыт вовас, Марпида Саревна петас кильчӧ вылӧ, чукӧстас ассьыс эньки-мамкиӧс. И ӧти войӧн найӧ вӧчасны куим суда, зэв гажа каменнӧй вичко. Поп и дяк и быдтор эм, толкӧ оз на сьывны, оз звӧнитны, водз на. Югдӧ нисьӧ, оз нисьӧ пӧрас, Марпида Саревна и садьмӧдас Ӧльӧксейӧс, сетіс кызь вит пудъя мӧлӧт, шувӧ Ӧльӧксейлы. Тэ пӧ мунан да вичко дор асывлун пельӧсас сувт. Сэті пӧ кутас кыпӧдчыны мусьыс тая дедысь на важджык дед. Выль зятьлысь пӧ киподтуйсӧ видла, сія пӧ кутас шуны, а тэ пӧ эн лэдз, малыштас кӧ пӧ сія вичкотӧ, пусь-пась жугалас, нинӧм оз коль. А мыйӧн пӧ сія кыпӧдчыны кутас, плешкас пӧ и кучкы тая мӧлӧтнад. Куимысь пӧ кыпӧдчылас, и куимысь пӧ кучкы, сэсся пӧ шыбыт мӧлӧттӧ дай лок гортӧ.

Ӧльӧксей босьтіс кызь вит пудъя мӧлӧт и муніс, сувтіс вичко дорӧ асывлун пельӧсӧ. Коркӧ-й сырк-сыркмуні, муыс потны кутіс, кыпӧдчӧ да. Выль зятьлысь пӧ киподтуйсӧ видла, шувӧ кыпӧдчысьыд. Ӧльӧксей, зонмӧ, эз повзьы да плешас мӧлӧтнад колскис-кучкис. О, тан пӧ тай номъяс лэбалӧны, курччасьӧны, шувис дед, сэсся вӧйтчыштліс и ӧпеть кыпӧдчыны пондіс. Выль зятьлысь пӧ киподтуйсӧ колӧ видлыны, шувӧ. Ӧльӧксея-Божъя бара вачкис мӧлӧтӧн ещӧ ёнджыка. А дед и шувӧ, о, тан пӧ ещӧ гутъяс на эмӧсь. И ӧпеть вӧйтчыліс. Но, сія пӧ тай менӧ смекайтӧ, зонмӧ, шувӧ Ӧльӧксея-Божъя, часлы, петалан пӧ ещӧ. Мыйӧн сійӧ шувис, ӧпеть кутіс кыпӧдчыны дед, чургӧдіс плешсӧ. Ӧльӧксея-Божъя лӧсьӧдчӧма нин, чеччыштлӧмӧн косьыштіс-кучкис. О, тан пӧ тай и лӧдзьяс на вӧлӧмась, бара шувас дед. Сымда и мӧрччӧ сылы, кызь вит пудъя мӧлӧтӧн кучкӧмыд лӧдз курччӧм кодь. Вот вӧлӧмась йӧзыс! Но, сія пырис сэсся, вӧйтчис и эз нин петов. Ӧльӧксея-Божъя мӧлӧт шыбытіс и муніс гортас.

Вовис асыв, йӧз чеччисны, вичко эм. Выль вичко сулалӧ, сэтшӧм гажа, мича вичко. Клёнгыны кутіс звӧнитны, поп-дяк, певчейяс сьылӧны, ставыс как шледует быть. Аттӧ пӧ дивӧ, эг вермы изведитны, шувӧ Ӧльӧксейлӧн чой. И ӧпеть муніс дед дорӧ, тшӧктӧ чукӧртны бал, мед бал вылын изведитны сар гозъяс.

Аски вӧчӧны бал, корӧны сар гозъяс гӧститны. Марпида Саревна и шувӧ, миянӧс пӧ гӧститны корӧны, а тӧлк мунны абу, миянӧс пӧ изведитны кӧсйӧны, вай пӧ пышъям татысь. А вай пӧ и эм, шувӧ Ӧльӧксей. Ная куим дуль толькӧ сьӧлыштісны, быдлаті игналісны и вой шӧр гӧгӧр пышйисны.

Эмбур-добра ставсӧ колины, босьтісны сьӧраныс сӧмын ичӧтик куд, кулак ыджда кымын.

Но, ладнӧ, аскинас дед чукӧртіс бал. Ыстӧ корны гӧстьясӧс.

— Мун,— шувӧ салдатлы,— ветлы да кор сар гозъятӧ.

Салдат муніс сар ордӧ, гӧгӧр игана. Салдат таркнитіс, бал вылӧ пӧ корӧны. Ӧти дуль и ӧтветшайтӧ, а ми пӧ ещӧ узям на, чеччам дай локтам. Салдат муніс бӧр, висьталӧ дедлы, узьӧны на пӧ вӧлі, кӧсйисны чеччыны да локны.

Виччысисны, виччысисны сар гозъяс, век оз локны. Дед и ӧпеть ыстӧ салдатӧс, регыдджык пӧ мед локтасны, виччысям пӧ. Салдат и ӧпеть муніс, таркӧдчӧ да чуксасьӧ, локтӧ нин пӧ, виччысьӧны тіянӧс. А мӧд дуль и ӧтветшайтӧ, а вот пӧ мӧсъяс лысьтыштам да мый да и локтам. Салдат муніс, висьталӧ дедлы, чеччӧмаӧсь нин пӧ эськӧ, да мӧсъяс лысьтӧны.

Ӧпеть виччысисны, виччысисны, сар гозъя век абуӧсь. Дед и скӧрмис нин, мый пӧ та дыра оз локны. Ветлы пӧ ещӧ, шувӧ салдатлы, да мед пырысь-пыр локтасны. Коймӧд раз салдат муніс, локтӧ пӧ нин, дедыд пӧ корис пырысь-пыр. А коймӧд дуль и ӧтветшайтӧ, джодж пӧ вот чышкам самӧй, чышкыссяс пӧ джодж, пасьтасям и локтам. Салдат муніс, висьталӧ дедлы, джодж пӧ нин чышкӧны, мыйӧн пӧ чышкыссяс, пасьтасям пӧ и локтам.

Ӧпеть время колис, эз локны гӧстьяс. Ӧдвакӧ пӧ абу изьмена тайӧ, думайтӧ дед. Сэсся-й корис салдатъясӧс, дас кымынӧс, гашкӧ, мунӧ пӧ да силан вайӦдӧй сар гозъяс. Асьныс кӧ пӧ эз локны, ми пӧ и вайӧдам да. Салдатъяс мунісны, таркӧдчисны, чуксасисны, некод оз шывась. А коді нӧ и шывасяс. Куим дуль ӧтветшайтісны, ӧтветшайтысь абу сэсся некод. Но салдатъяслы тшӧктӧма вайӧдны силан, ная давай и жугӧдчыны. Жугӧдісны ӧдзӧстӧ, пырисны, керкан абу некод. Но и пышйӧмась, абуӧсь. Салдатъяс давай бӧр, висьталӧны дедлы, сідз пӧ и сідз, некод эз шывась, ми пырим, сар гозъя гортас абуӧсь.

— Ак-ма,— шувӧ дед,— ная тай изьменитӧмась меным, пышйӧмась. Зэв ёна скӧрмис, кысь пӧ аддзад, сэсь пӧ и виӧй, шувӧ дед, ыстӧ сё салдатӧс вӧтчыны. Сувӧдӧй пӧ и виӧй.

Но, ладнӧ. А Марпида Саревна да Ӧльӧксея-Божъя пыр мунӧны водзӧ, ылӧ нин мунӧмась. Мунісны, мунісны ещӧ, Марпида Саревна ий шувӧ, кытчӧ пӧ Ӧльӧксей воштысям, дедыд пӧ миян бӧрся сё салдатӧс ыстӧма, сувасны кӧ, виасны. Ог пӧ тӧд, шувӧ Ӧльӧксей. Саревнад сэсся пыркнитіс Ӧльӧксейӧс и зэв пӧрысь часовня лови, зэв пӧлӧс, муртса оз пӧр. Сэсся ачыс пыркнитчис да поп лови, пондіс служитны часовнян. Олыштісны, олыштісны, да коркӧ и сё салдат локтӧны, сэтшӧм-сэтшӧм мортъясӧс пӧ эн аддзылӧ, юалӧны поплысь. Эг пӧ, шувӧ сія. Но, ладнӧ, таті кӧ пӧ эз мунны, и миянлы водзӧ нинӧмла мунны, шувӧны салдатъяс. Сэсся и бергӧдчисны бӧр. Вовисны дед дорӧ, дедлы и висьталӧны, вӧтчылім пӧ эськӧ да эг аддзылӧй, толькӧ зэв пӧрысь часовня сулалӧ туй дорас.

— А~к-ма,—1 шувас дед,— мыйла нӧ эн дрӧбитӧ кусью. Тая вӧд ная и вӧліны.

Сія кӧлдун кодь, тӧдӧ, видзӧд, сар гозъяд пӧ пӧртчисны сійӧ. Сейчас ыстіс кыксё салдатӧс жугӧдны, дрӧбитны часовняс. Но, ладнӧ. Салдатъяслы быть мун. Мунісны, мунісны ная да, дерт, сія часовнятӧ эз аддзыны, абу да. Ная, сар гозъяд, важӧн нин бӧр пыркнитчылісны и мунісны водзӧ. А салдатъяс водзӧ жӧ мунӧны, пыр водзысьӧны часовнятӧ. Марпида Саревна и шувӧ, Ӧльӧксея-Божъя пӧ, кыксё салдат пӧ дедыд миян бӧрся ыстӧма.кытчӧ пӧ воштысям. Ог пӧ тӧд, шувӧ Ӧльӧксей. Но, Саревна сія Ӧльӧксейӧс пыркнитіс, кыдз лови, ачыс пыркнитчис да тар лови. Тар лэбзис, пуксис кыдз йылӧ и пондіс кокавны, сёйны гарсӧ. Коркӧ-й локтӧны кыксё салдат. Ная ювалӧны тарлысь:

— Тарӧ, тарӧ, сэтшӧм-сэтшӧм мортъясӧс эн аддзыв, эз мунны таті?

Тар шувӧ, кур, кур пӧ. А мый пӧ тайӧ кужас висьтовны, вайӧ пӧ бӧр бергӧдчамӧ, ог жӧ нин аддзӧ-а. Но сэсся ная и бергӧдчисны. Дед и ювалӧ, аддзид энӧ пӧ кодӧскӧ? Эгӧ пӧ, шувӧны сылы, нинӧм пӧ эг аддзылӧй, а толькӧ пӧ кыдз вӧлі сулалӧ туй дорас и тар пукалӧ кыдз йылын. Ак-ма, сія пӧ вӧд и вӧлі, шувӧ дед, мунӧ пӧ регыдджык дрӧбитӧ сійӧ и тарсӧ виӧй.

Салдатъяс ӧпеть мунісны, куимсё нин дедыд ыстіс. Кыдз сія, тӧдӧмысь, абу. Ная важӧн нин пыркнитчылісны и мунісны водзӧ, код тӧдас кӧнӧсь нин. А салдатъяс, пыр водзысь виччысьӧны да, мунӧны и мунӧны жӧ.

Марпида Саревна и ӧпеть шувӧ мужиклы, куимсё салдат пӧ нин вӧтчӧны, куимсёӧс пӧ дедыд ыстӧма, кытчи пӧ миянлы воштысьны. Ме пӧ ог тӧд, шувӧ Ӧльӧксей. А гӧгӧр чистӧй луг, ни ӧтик пу, ни ӧти бадь абу, но нинӧмысь-нинӧмтор абу. Вот и дзебсьы сэн! А Марпида Саревна пыркнитіс Ӧльӧксейӧс, пыркнитчис ачыс, кык кыдз пу ньӧр лови, кык леторос, зэв сэтшӧм мичаӧсь, веськыдӧсь. Салдатъяс вовисны, пондісны любуйтчыны:

— О, мичась жӧ, сись кодьӧсь, веськыдӧсь.

Кодкӧ и заводитліс эськӧ чегны да, ӧти шувӧ:

— Эн вӧрзьӧд!

Мӧд шувӧ:

— Эн вӧрзьӧд, сэтшӧм мича тая.

Сэсся эз и вӧрзьӧдны, мунісны бӧр. Вовисны, дед ӧпеть ювалӧ:

— Но, мыйкӧ аддзинныд эн?

Эгӧ пӧ, шувӧны салдатъяс, толькӧ пӧ кык леторос луг вылысь аддзылім. Ак-ма, сія пӧ вӧд и вӧліны ная, шувӧ дед, тіянлы пӧ колі чегъявны да керовны найӧ. Сэсся-й шувӧ, ловӧ пӧ аслым ветлыны, тіян помысь пӧ тай нинӧм лови, час пӧ ме ачым вӧтчыла, меысь пӧ, надейнӧ, оз пышйыны. Петіс ачыс, пондіс вӧтчыны сар гозъя бӧрся.

Марпида Саревна и шувӧ мужикыслы, вот пӧ, Ӧльӧксея-Божъя, дедыд пӧ ачыс петӧма миян бӧрся вӧтчыны. Вот пӧ ми сыысь пышйыны ог вермӧй, сія пӧ сувӧдас и тӧдас, кӧть мыйӧ пӧртчысь. А самӧй ю дорӧ вовисны, зэв сэтшӧм мича, паськыд ю. Саревна и пондіс шуны, ми пӧ пӧртчысям уткаясӧ да вуджам мӧдарас, сылы киас ог сюрӧдчӧй. Но сія пӧ тӧдас миянӧс и ёрас миянӧс. Тэд пӧ сія ёрӧм оз имит, тэ пӧ мӧд рӧдысь, пыркнит-чан пӧ, бӧр лован морт. А ме пӧ ог ло. Тэ пӧ, сэсся, мун гортад, виччысь менӧ, ме пӧ локта куим во да куим лун бӧрын. Но, ладнӧ. Сэсся ная уткаясӧ йӧртчисны, и уткаяс жбыр лэбзисны. Удитісны ли эз мӧдарӧдз воны, пуксьыны ва вылӧ, дед вовис ю дорӧ. Ак пӧ, кужинныд вӧчны, меысь пӧ эськӧ ті эн пышйӧй. Но, будь пӧ тіянлы куим во да куим лун уткаӧн лэбавны, ёрис дед. А уткаяс варччисны дай берегӧ петісны, мӧдарас. Берегӧ петісны, ӧти уткаыд пыркнитчис да морт лови, Ӧльӧксей, а мӧдыд эз. Сія уткан коли, ёрӧмыд имитӧма да. Сія и жбыр лэбзис Ӧльӧксей дінысь и воши кытчикӧ, морт дінад тай уткад дыр оз ов, полӧ сія. Дерт, шуам, позис эськӧ Ӧльӧксейлы босьтны и нуны гортас, мед эз лыйны ли мый ли окотникъяс, да эз путьмы сія. Но, Ӧльӧксея-Божъя коли ӧтнас. Шогсис, шогсис, жалитіс гӧтырӧс и мӧдӧдчис гортӧ, бать-мам ордӧ. Гортӧ мунны пондіс, нюр вовис, зэв сэтшӧм ыджыд, паськыд. Сія и пуксис колода вылӧ шойччыны. Шойччыны пуксис и думайтӧ. Аттӧ пӧ дивӧ, мый ыджда пӧ вӧлі овмӧс, мыйда эмбур, кӧлуй и деньга, да нинӧм пӧ эг босьтӧй, ставсӧ пӧ эновтім, а этъя куд пӧ босьтім. А мый пӧ и эм тані, кулак ыдждад, час пӧ ловӧ видлыны, шувӧ сія, кӧсйӧ восьтыны кудсӧ. Кудсӧ восьтіс, а сэтысь сарство лови. Нюр воши кытчикӧ, а нюр местан ловины керкаяс, вичкояс, но быдторйыс, сарство сарство и эм. Ачыс пызан сайын пукалӧ, а пызан вылын мыйыс абу, и сёян, и юван быдпӧлӧсыс, но мый колӧ, мый кужан думыштны. Сёйис-ювис Ӧльӧксей, сэсся и мунны колӧ, ӧтнас вӧд, гажтӧм, а кольньг еарство жаль.

— Мыйла,— шувас,— ме восьті тайӧс-а. Эз ков,— шувӧ,— восьтны меным.

А кыдзи бӧр тӧрӧдны кудйӧ, сія оз куж. Гашкӧ, оліс сэні лун вит ли квайт, кольны сарство жаль и мунны колӧ.

— Аттӧ,— шувас,— оз сёйсьы ни оз узьсьы, мый кута керны?

Пызан дорас лэдзчысис дай унмовсис сэсся. Марпида Саревнаыд сылы уськӧдчис вӧтӧн, по местам пӧ таркӧд куд вевттӧ, сарствоыд пӧ пырас бӧр. Ӧльӧксей садьмис, вӧт али вемӧс пӧ бара тайӧ. А час жӧ пӧ видла сётаки. Сэсся таркӧдны кутас куд вевтад, сарство бӧр ставыс пырас кудйӧ, и бӧр нюр ловӧ. Ой, ой, ӧдйӧ нин сэтысь сія муніс, кудтӧ босьтіс да.

Муніс, муніс, висьтавны, дерт, регыд, а мунны дыр тырмис, коркӧ и вовис аслас вӧлӧсьтӧ, поп оланінӧ. Вовис гортӧ и пондіс овны гортын, Марпида Саревнас виччысьны. Оліс, оліс во дай мӧдӧс, дай коймӧдӧс. Сэсся-й куим во дай куим лун тыри, а Марпида Саревна век абу. Тайӧ пӧ кодкӧ лыйис уткатӧ пищальӧн, думайтӧ Ӧльӧксей. Ловъя кӧ пӧ вӧлі, сія локтіс. И думайтіс гӧтрасьны сія, корасис вӧлӧсьтысь и быдтор.

А Марпида Саревна толькӧ на воис вӧлӧсьтӧ, дыр тырмис корсьны Ӧльӧксейтӧ. Сія прӧскурня ордӧ сувтіс и ыстіс кык детинкаӧс, ассьыс челядьсӧ Ӧльӧксея-Божъя ордӧ. Найӧ сія вайӧма здвӧйниӧн, зэв мича челядь, квайт арӧса койдӧсь, асьныс эськӧ куйм арӧсась на да. Пырисны Ӧльӧксея-Божъя керка(ӧ). А сэні самӧй пируйтӧны, керка тырыс гӧсьт да гӧстя. Ӧльӧксея-Божъя самӧй гӧтрасьӧ. Шойччӧ пӧ, шувӧ Ӧльӧксея-Божъя, кысь пӧ ті войтырыс? А ми пӧ асьным огӧ тӧдӧ, шувӧны челядь. А он-ӧ пӧ жалайтӧ кывзыны сказка, ми пӧ мойдны кужам. Мойдӧ пӧ, шувӧ Ӧльӧксей. Ная и кутісны мойдны, ставсӧ мойдісны, мый ме ӧні мойді. Ӧльӧксей кывзіс, кывзіс и думайтӧ, аттӧ пӧ дивӧ, тайӧ тай нӧ миян йылысь мойдісны. И ювалӧ сэсся, кӧн пӧ ті олад. Вичко нянь пӧжалысь ордын пӧ олам, прӧскурнятӧ ная шувисны сідзи. Пырысь-пыр накӧд и муніс Ӧльӧксей прӧскурня ордӧ, эновтіс пируйтысьясӧс и невестасӧ. Пырис прӧскурня ордӧ, зэв нин пӧрысь да мисьтӧм нывбаба пукалӧ. Тэ пӧ абу жӧ Марпида Саревна, шувӧ Ӧльӧксей. Ме пӧ, шувӧ старука, быдтысьӧмнад пӧ тай пӧрысьман ӧдйӧ. Ог пӧ верит, шувас и петас, мунны пондас. А ӧшиньӧд и мыччысьлас, видзӧдлас зэв мича, важкодьыс на том Марпида Саревна. Ӧльӧксея-Божъя ӧдйӧджык бӧр бергӧдчас и пырас керка(ӧ). Паччӧр дорын ӧпеть пукалӧ пӧрысь. Вай пӧ эн ылӧдлы менӧ, шувӧ Ӧльӧксей, висьтась нин. А висьтаси пӧ гай, со, пукала, аддзан ачыд. Ӧльӧксея-Божъя бара пондылас мунны и сідзи куим раз бӧр бергӧдчас.

Коймӧдысь пырас да Марпида Саревна абу нин пӧрысь, важкодь мича пукалӧ. Сія томман лекарствотӧ сёйыштіс и, дерт, важкодь мича лови. Но, ладнӧ. Ӧльӧксея-Божъя сэсся ассьыс невестасӧ бӧр здолойтіс, Марпида Саревнас челядьнас босьтіс гортас. Сэтчӧ жӧ, поле вылӧ, керкаяс дорас паськӧдіс кудйысь сарство, ыджыд да мича. Сія сарствон сэсся и кутісны сарствуйтны, овны. Зэв бура олӧны, сёян-юван оз бырлы, быдтор эм, но, колӧкӧ-й и талун на олӧны-вылӧны.

Коми Мойдъяс

*   *   *

Реклама Google: