Komi Zyrians Traditional Culture

КОМИ КУЛЬТУРА ГРАММАТИКА СЛОВАРИ ЛИТЕРАТУРА МУЗЫКА ТЕАТР ЭТНОГРАФИЯ ФОТОАРХИВ КНИГИ

Чукӧртіс Ю.Рочев.

КАНЬ ДА ПЕТУК · Коми Мойд

О
О

лісны-вылісны кань да петук. Ӧтчыд муніс кань пес керавны. Мунігӧн кань шуис петуклы:

— Тэ бара, ёма локтас да, эн пет, нуас!

— Ог пет,— шуис сылы петук.

Кань муніс. Муртса мышкуыс бердіс, локтіс ёма-баба, кутіс горзыны:

— Петукӧй, пет жӧ, пет! Мича дзолльӧн дзоллясям, чунькытш пыр котрасям!


Петук шуӧ:

— Ог пет! Кань эз тшӧкты.

Ёма-баба мунас. Кань локтас.

— Эн пет?

— Эг,— шуас петук.

Аски бара мунас кань. Бара шуас петуклы:

— Талун бара эн пет. Ёмалӧн талун нимлун, тэнӧ сёясны.

— Ог,— шуӧ петук.

Тӧкӧтьӧ мышкуыс каньлӧн бердіс, ёма-баба бара нин локтіс и кутіс горзыны:

— Петукӧй, пет жӧ, пет! Мича дзолльӧн дзоллясям, чунькытш пыр котрасям.

Петуклы окота лои ворсны и шуис:

— Тайӧ пельсасӧ лэптышт, ме сы улын.

Ёма-баба лэптыштіс пельсатӧ, петукӧс кватитіс и нуис. Тайӧ лунас ёма-бабалӧн вӧлі нимлун. Петукӧс и жаритісны.

Кань локтіс:

— Петук, тэ эм-абу?

Некод оз шыась. Муніс ёма-баба ордӧ и кильчӧ вылас сьывны кутіс:

— Петукӧй, петукӧй, мый нин тэ думайтан?

Ёма-баба кылас и шуӧ:

— Пиӧ, мун петав, коді сэтшӧм мичаа сьылӧ. Мамыдлӧн нимлун, петук яй — пир.

Пи петас. Кань сійӧс кватитас и виас. Бара кутас сьывны кань. Ёма-баба мӧд пиӧс ыстас. Кань сійӧс чабыртас. Тышкасясны да, тышкасясны да. Кань и виас сійӧс. Бара кань кутас сьывны: "Петукӧй, петукӧй, мый нин тэ думайтан?"

Ёма-баба ачыс петас. Кань уськӧдчас сы вылӧ. Тышкасясны да, тышкасясны да. Кань и вермас ёмаӧс. Керкаӧ пырас. Петукӧс быглялас, быглялас — петук и гӧнсявны кутас. Ещӧ быглялас, и петук жбыр лэбзяс сёр вылӧ.

Кань босьтас петукӧс, и мунасны гортас. И ӧні на олӧны-вылӧны.


Кукла "Кошка Матильда", Мария Терентьева, Сыктывкар. Выставка "Кукольное сердце", Сыктывкар, декабрь 2012.

Примечание. Кань да петук. Гижӧма кутшӧмкӧ Макаров Опонь, тыдалӧ, 1920-ӧд воясын. Текстсӧ босьтӧма А.С.Сидоров архивысь. Пемӧсъяс йылысь мойд. Сюрӧсыс уна лыда варианта да тӧдса уналаын (СУС — 61 В). Коми мойдысьяслысь гижӧма уна жӧ вариант, некымынысь нин вӧлі йӧзӧдлӧма. Тайӧ текстас каня-петуклы паныд сулалӧ оз руч, а ёма да сылӧн пияныс — коми фольклор традициялӧн подулыс ёна тӧдчӧ. Чунькытш пыр котрасям (оригиналас: чунькытш пыр кудзчӧн котрасям) — кутшӧмкӧ важъя ворсӧм, сэтшӧм жӧ, кыдзи "эзысь дзолльӧн дзоллясьны, зарни мачӧн мачасьны", мый йылысь тшӧкыда казьтыссьӧ коми мойдъясын. Талун кежлӧ тайӧ ворсӧмъясыс миян олӧмын оз нин паныдасьлыны да гӧгӧрвотӧмӧсь.

Коми Мойдъяс

*   *   *

Реклама Google: